Policia thërret drejtorin e Inspektoratit Komunal në Mitrovicën e Veriut; Orlloviq: Presion ndaj punës sonë

Drejtori i Inspektoratit Komunal në Mitrovicën e Veriut, Velko Orlloviq, është ftuar sot për të dhënë deklaratë në stacionin policor, pasi inspektorati kishte urdhëruar ndërprerjen e punimeve për ndërtimin e një objekti në afërsi të menjëhershme të kishës së Shën Dimitrit për shkak të mungesës së dokumentacionit. Orlloviq iu përgjigj ftesës dhe, pasi dha deklaratë në polici, u tha gazetarëve se kjo thirrje përbën presion ndaj komunës dhe inspektorëve.

Inspektorati komunal të premten, më 6 mars, njoftoi se kishte ndaluar punimet në kantierin pranë Kukavicës, pasi nuk kishte pëlqim për zhvillimin e punimeve. Megjithatë, punimet vazhduan sot, kështu që inspektorët dolën sërish në terren, por zyrtarët policorë që u paraqitën në vendngjarje i ftuan ata në stacionin policor.

Orlloviq, pasi dha deklaratë në polici, tregoi se pavarësisht vendimit të Drejtorisë për Inspektim, punimet në kantierin pranë Kukavicës sot vazhduan, edhe pse investitori nuk i kishte përmbushur kushtet për shkak të të cilave punimet ishin ndërprerë, prandaj inspektorati doli sërish në terren dhe i ndaloi përsëri punimet.

“Në të premten kishim kontrollin tonë në vendin Kukavica, ku po zhvillohen punime ndërtimore, ku po ndërtohet një shkollë. Gjatë këtij inspektimi konstatuam shumë parregullsi, duke filluar nga standardet ndërtimore, ku gardhi mbrojtës nuk ishte ndërtuar në mënyrë adekuate, ndërsa fëmijët kalojnë dhe luajnë vazhdimisht aty. Gjatë vizitës gjetëm fëmijë në atë vend, dhe përveç kësaj edhe një eskavator që po gërmonte dhe po hidhte dhe në një parcelë komunale, në një sipërfaqe publike që i përket komunës, ku investitori dhe kontraktori nuk kishin leje të përshtatshme për përdorimin e asaj parcele. Ne

atëherë i ndaluam punimet dhe vendosëm gjoba administrative”, tha Orlloviq.

Siç shpjegon ai, ishte rënë dakord që investitori të vinte në komunë për të verifikuar se cilat dokumente i mungonin në mënyrë që të mund të vazhdonte punimet.

Në vend të kësaj, ai sot vazhdoi punimet pa lejet e nevojshme, ndërsa pas mbërritjes së inspektoratit në vendngjarje u paraqit edhe policia, e cila i kërkoi Orlloviqit të paraqitej në stacionin policor.

“Pavarësisht kësaj ndalese, ata sot vazhduan punimet, me gërmime dhe hedhje dheu në atë parcelë. Ndërsa po përgatisnim sërish procesverbalin dhe po bisedonim me njerëzit që ndodheshin aty, me punëtorët që ishin në terren, erdhi policia, të cilën ne nuk e kishim thirrur. Përndryshe, kur i thërrasim për disa raste të tjera, ata nuk na ofrojnë asistencë, por thjesht nuk përgjigjen. Kur erdhi policia, kërkuan që të shkonim në stacionin e tyre për të biseduar, gjë që përbën presion ndaj komunës, inspektorëve të mi dhe ndaj meje. Mendoj se të gjitha këto mund t’i bënin duke ardhur tek ne në komunë që t’u tregonim se me çfarë dokumentesh disponojmë dhe çfarë duhet bërë më tej që punimet të vazhdojnë”, theksoi Orlloviq.

Ai përsëriti se investitori nuk i ka përmbushur kërkesat që i ka vendosur inspektorati, prandaj ndërhyrja e sotme ishte e domosdoshme.

“Punimet janë ndalur përsëri, është vendosur shiriti ndalues. Edhe pse ne kemi vendosur ndalimin, policia ende pretendon se ata duhet të vazhdojnë me punimet, edhe pse ne i kemi ndaluar. Do të shohim si do të zhvillohet situata më tej, nëse policia do t’ua lejojë apo jo. Ne vazhdojmë me procedurat tona. Është edhe gjykata që do të vendosë se kush ka të drejtë. Ne, po të mos kishim të drejtë, nuk do ta bënim këtë”, përfundoi Orlloviq.