Zlatanovska Popova: Për gjeneratat e reja i rëndësishëm është balanci mes jetës private dhe punës

Gjeneratat e reja në Maqedoninë e Veriut po ndryshojnë mënyrën e të menduarit gjatë zgjedhjes së profesionit dhe vendit të punës, sepse për ta është e rëndësishme të ekzistojë një balancë mes jetës private dhe punës, ndërsa gjithnjë e më shumë janë të hapur të shqyrtojnë mundësinë që të jetojnë në vendin e tyre, por të punojnë për punëdhënës jashtë vendit, ka deklaruar këshilltarja për karrierë Katerina Zlatanovska Popova.

“Mendësia e të rinjve po ndryshon dhe tani ata interesohen se ku do të kenë një jetë më të mirë, por jo për t’u shpërngulur nga vendi, por për një jetë më të mirë në përgjithësi. Cili profesion dhe cilë aftësi do t’ua mundësojë këtë, që të kenë balancë mes punës dhe jetës private. Për gjeneratat e reja kjo ka shumë rëndësi, u duhet që të kenë balancë mes jetës private dhe punës”, tha Zlatanovska Popova për Kosovo online.

Ajo thotë se është interesant fakti që të rinjtë janë gjithnjë e më të hapur të shqyrtojnë mundësinë që të jetojnë dhe punojnë në vendin e tyre, por për një punëdhënës jashtë vendit.

“Po fillojnë të kuptojnë mundësinë dhe madje përfitimin që të qëndrojnë këtu ku i kanë miqtë dhe familjen, ndërsa të shqyrtojnë mundësitë se si të punojnë për klientë dhe punëdhënës që janë jashtë shtetit. Gjeneratat e reja kanë privilegjin të shqyrtojnë mundësi të tilla – në vend që të emigrojnë, të jetojnë në Maqedoni dhe të punojnë për kompani jashtë vendit duke fituar paga më të larta”, tha Zlatanovska Popova.

E pyetur nëse nevojat e tregut janë në përputhje me ofertën e shkollave, përkatësisht me profilet arsimore, ajo u përgjigj se ka përparim të madh në këtë drejtim dhe vëren një trend pozitiv sa i përket arsimit profesional, por se ende ka shumë për të bërë.

“Statistikat tregojnë se në dy vitet e fundit arsimi profesional po bëhet gjithnjë e më modern dhe më interesant për të rinjtë, ndërsa interesimi për gjimnazin është në rënie. Kjo ndodh sepse arsimi profesional ka filluar të lidhet drejtpërdrejt me sektorin e ekonomisë. Të rinjtë që regjistrohen në shkolla të mesme profesionale kanë mundësinë të ndjekin arsimin dual, që do të thotë se një pjesë e mësimit zhvillohet te punëdhënësi. Shumë kompani ofrojnë bursa për nxënësit e shkollave të mesme, u japin mundësinë të punojnë në kompani, marrin bursë dhe në fund marrin drejtpërdrejt ofertë për punësim”, tha Zlatanovska Popova.