Shala: Falsifikimi i rezultateve të zgjedhjeve është vepër penale, e dënueshme deri në pesë vjet burg

Hulumtuesi i lartë në Institutin e Drejtësisë të Kosovës, Gëzim Shala, beson se manipulimi i votave që u vu re gjatë rinumërimit të votave për kandidatët parlamentarë është një skandal i madh që dëmtoi integritetin e procesit zgjedhor në Kosovë.

Ai theksoi për Kosova Press se falsifikimi i rezultateve të zgjedhjeve është një vepër penale që sanksionohet qartë me ligj, e dënueshme deri në tre vjet burg, ndërsa në raste të rënda ose të kualifikuara mund të arrijë deri në pesë vjet.

"Lidhur me falsifikimin e rezultateve të zgjedhjeve, parashikohet një dënim prej tre vjetësh, dhe forma e kualifikuar është pesë vjet. Padyshim, ajo që ndodhi është një nga skandalet më të mëdha në lidhje me integritetin e procesit zgjedhor që nga zgjedhjet e viteve 2000 dhe 2010. Në këtë rast të veçantë, prokurori duhet të veprojë", tha Shala.

Zyra e Kryeprokurorit të Kosovës njoftoi dje se koordinatorja kombëtare për zgjedhjet, prokurorja Laura Pulja, u kërkoi kryeprokurorëve të të gjitha prokurorive themelore të fillojnë mbledhjen e informacionit të nevojshëm dhe të paraqesin prova relevante që konfirmojnë kryerjen e çdo vepre penale në lidhje me procesin zgjedhor në të gjitha komunat ku ka përfunduar procesi i rinumërimit të votave.