Janjiq dhe Antonijeviq: Pikat e kontroliit policore në veri të Kosovës nuk janë zgjidhje, do të ketë incidente të reja

Incidenti i fundit me plagosjen e serbëve në Zveçan tregon se sa i rrezikshëm është militarizimi i veriut të Kosovës me praninë e njësive speciale të Policisë së Kosovës, theksuan në intervistën për Kosovo online Dushan Janjiq, drejtor i Forumit për Marrëdhënie Etnike, dhe Millan Antonijeviq, aktivist i shquar i sektorit civil.

Janjiq paralajmëron se vakuumi i sigurisë në veri të Kosovës nuk është plotësuar, edhe pse të gjithë sillen sikur të jenë, përfshirë edhe përfaqësuesit e bashkësisë ndërkombëtare dhe autoritetet e Kosovës.

“Vakuumin e sigurisë nuk mund ta plotësojnë forcat speciale sepse ata vetë janë në një gjendje të veçantë tensioni dhe pajisjesh, dhe vetëm grumbullimi i tyre nuk është një garanci, por një dëshmi se nuk ka siguri. Sigurisht që do të ketë incidente të reja”, beson Dushan Janjiq.

Janjiq thekson se ka filluar lufta për ndryshimin e Marrëveshjes së Brukselit nga viti 2013, dhe ndryshimin e strukturës etnike të SHPK-së dhe strukturave komunale duke shpallur tenderë të rinj.

“Nga ana tjetër, nëse disa persona konsiderohen kriminelë apo grupi Vagner dhe flitet për këtë, nuk ka pasur veprime, pra është propagandë dhe tentativë për të politizuar problemin. Çështja kryesore është se si njerëzit nga autoritetet e Kosovës dhe Serbisë do të komunikojnë lidhur me çështjet e sigurisë. Kështu, kur ndodhin incidente, KFOR-i është një element i vogël brenda NATO-s, dhe EULEX-i nuk po e bën punën e vet, por është reduktuar në vëzhgim”, tha Janjiq për Kosovo online.

I pyetur nëse EULEX-i mund të marrë pikën e kontrollit pranë urës së Bistricës, Janjiq përgjigjet negativisht.

“EULEX-i është një mashtrim, nuk mund ta marrë pikën e kontrollit. Ata ishin të parët në krye të ekonomisë dhe privatizimit, dhe kur u ngatërrua aty, kur doli në shesh korrupsioni, vetë BE-ja deklaroi brenda natës se po e anulon atë punë dhe se EULEX-i po merrej me trajnimin e forcave policore dhe ata menjëherë reduktuan numrin e forcave të tyre. Bëhet fjalë se a do të krijohet një platformë e përbashkët e përfaqësuesve të Serbisë dhe Kosovës për çështjen e kthimit të serbëve në SHPK dhe me çfarë dinamike. Është e qartë se këto incidente përhapin frikë në komunitetin serb, edhe pse numri total i incidenteve në krahasim me vende të ngjashme në botë është nën mesataren, që do të thotë se këtu njerëzit janë më të përgjegjshëm se politikanët, por në të njëjtën kohë populli po vuan. Sigurisht që do të ketë incidente të reja”, thotë Janjiq.

Kur është fjala për reagimin e bashkësisë ndërkombëtare, Janjiq beson se Gjermania dhe Franca e mbështesin Kurtin që të vazhdojë të veprojë sikur serbët nuk janë larguar nga institucionet, dhe amerikanët janë të lodhur qartë nga disa gjëra dhe po bëhen agresivë në kërkimin e zgjidhjeve për zgjidhjen e çështjes së sigurisë.

Aktivisti i sektorit civil dhe juristi Millan Antonijeviq tha për Kosovo online se incidenti i fundit tregon se çështja e sigurisë është më e rëndësishmja për serbët në Kosovë.

“Ky incident nuk është i pari në seri dhe tregon se çështja e sigurisë është më e rëndësishmja për serbët në Kosovë. Është mirë që ekziston shqetësimi i komunitetit ndërkombëtar, por ky rast nuk duhet të mbetet pa epilog dhe detaje për atë që ka ndodhur. Në të njëjtën kohë, kjo tregon se sa i dëmshëm është militarizimi i Kosovës dhe pikat e kontrollit që vendosen nuk duhet të bëhen praktikë, sepse i trembin të gjithë, veçanërisht serbët. Dialogu mes Presidentit të Serbisë dhe Kryeministrit të Kosovës po vazhdon dhe po shkon drejt normalizimit të plotë të marrëdhënieve, dhe këto nuk janë pikat e konzrollit policore dhe thasë me rërë, por liri e plotë e lëvizjes, respekt i plotë i të drejtave të njeriut”, thotë Antonijeviq.