Ishinger: Shpresoj se Kosova dhe Serbia do ta pranojnë iniciativën gjermano-franceze

Volfgang Ishinger, një diplomat gjerman dhe ish i dërguar i Bashkimit Evropian për statusin e Kosovës, në një intervistë për Kosovo Online ka thënë se shpreson se "serbët nga veriu do të inkurajohen nga Beogradi që të kthehen në institucione" dhe se të gjithë elementët e Marrëveshjes së Brukselit duhet të respektohen dhe zbatohen nga të gjitha palët e përfshira.

Shumë njerëz e krahasojnë propozimin franko-gjerman për dialog mes Kosovës dhe Serbisë me modelin “e dy Gjermanive” dhe propozimin tuaj të disa viteve më parë. A mendoni se Beogradi dhe Prishtina do ta pranojnë një propozim të tillë?

Unë sigurisht shpresoj se do ta bëjnë  këtë, përveç nëse ata krijojnë një ide më të mirë se si të kapërcejnë çështjen e pazgjidhur e statusit.

Serbët nga veriu i Kosovës janë larguar nga institucionet, a mendoni se serbët do të kthehen në institucione dhe kur?

Shpresoj se serbët nga veriu i Kosovës do të inkurajohen fuqishëm nga Beogradi që të kthehen në institucionet e Kosovës. Kosova është vendi ku ata jetojnë.

Ambasadori e Rusisë në Beograd, Bochan-Kharchenko, së fundi deklaroi se Nisma për të cilën folët, nuk u lançua kurrë zyrtarisht në emër të "Trojkës" (BE, SHBA dhe Rusia), megjithëse u konsiderua si një nga opsionet e punës?

Sa i përket iniciativës sime të vitit 2007, natyrisht, ajo u mbështet plotësisht nga BE-ja dhe anëtari amerikan i "Trojkës", ambasadori Frenk Vizner. Ambasadori Bocan-Harçenko nuk e kundërshtoi propozimin, madje më inkurajoi të fluturoja për në Moskë dhe t'ia dorëzoja ministrit të Jashtëm Lavrov. Për fat të keq, qeveria ruse nuk mundi ta mbështesë propozimin për shkak të qëndrimit të kryeministrit të Serbisë, i cili ishte kategorikisht kundër tij.

A do ta respektojë Kosova Marrëveshjen e Brukselit dhe të themelojë Komunitetin e Komunave Serbe, dhe pas gjithë këtyre viteve që nga marrëveshja, a është realiste themelimi i Komunitetit së Komunave Serbe?

Siç e kuptoj unë, të gjithë elementët e Marrëveshjes së Brukselit duhet të respektohen dhe zbatohen nga të gjitha palët e përfshira.

A lidhet vendosja e sanksioneve ndaj Rusisë nga Serbia me çështjen e Kosovës dhe a do ta lehtësonte vendosja e sanksioneve pozitën e Serbisë kur bëhet fjala për dialogun me Kosovën?

Nëse Serbia dëshiron të vazhdojë me besueshmëri në rrugën drejt BE-së, duhet të bëjë të gjitha përpjekjet e mundshme për të harmonizuar politikën e saj të jashtme me politikën e Bashkimit Evropian. Kjo përfshin çështjen e sanksioneve kundër Rusisë. Prandaj, çështja e sanksioneve nuk ka të bëjë aq shumë me marrëdhëniet ndërmjet Beogradit dhe Prishtinës, sa që ka të bëjë me marrëdhëniet midis Beogradit dhe Brukselit.