KUSH është KUSH – Lumir Abdixhiku: I mbijetoi debaklit zgjedhor, a do ta rimëkëmbë LDK-në?

As rezultati zgjedhor i papriturisht i dobët i Lidhjes Demokratike të Kosovës në zgjedhjet e 28 dhjetorit, e as kritikat e kolegëve partiakë, nuk e lëkundën Lumir Abdixhikun nga pozita e kryetarit të LDK-së. Ai ofroi dorëheqjen, por i mbijetoi edhe “gjyqit” të Kuvendit të partisë dhe do të vazhdojë ta udhëheqë LDK-në, së cilës njohësit e rrethanave nuk i parashikojnë një të ardhme të ndritshme nëse nuk ndodhin ndryshime të brendshme.

Teksa po numëroheshin rezultatet e para paraprake më 28 dhjetor, u bë e qartë se LDK-ja kishte arritur një rezultat më të dobët sesa dhjetë muaj më parë. Abdixhiku atë natë para gazetarëve tha se rezultati i zgjedhjeve nuk ishte ai që kishte pritur, por se duhet respektuar, se nuk kishte arritur ta çonte partinë atje ku beson se duhet të jetë dhe se ky ishte një “moment për reflektim”.

Lidhja Demokratike e Kosovës në zgjedhje fitoi 13,24 për qind të votave, që i sollën 15 mandate deputetësh, më pak sesa pas zgjedhjeve të 9 shkurtit të vitit të kaluar.

Pas reflektimit, Abdixhiku thirri mbledhjen e Kryesisë së partisë dhe paralajmëroi se do t’ia ofronte dorëheqjen Kuvendit të partisë, i cili u mbajt disa ditë më parë.

Pavarësisht kritikave që i drejtuan disa kolegë partiakë duke kërkuar dorëheqjen e tij, ndoshta më zëshëm nënkryetarja e partisë Hikmete Bajrami, si dhe paralajmërimit të Avdullah Hotit se do të kandidonte për kryetar, Abdixhiku “mbijetoi”. Shumica e delegatëve e refuzuan dorëheqjen e ofruar dhe ai mbeti në krye të partisë.

Në reagimin pas përfundimit të Kuvendit të partisë, Abdixhiku tha se fokusi tani do të jetë në rimëkëmbjen dhe bashkimin e anëtarësisë.

“Rruga përpara për LDK-në ka një emër – rimëkëmbja”, tha ai dy ditë më parë.

Pyetja është nëse do të arrijë ta realizojë këtë. Disa analistë vlerësojnë se e ardhmja e partisë me të në krye është “e pasigurt”, sepse Abdixhiku, ndonëse e mori drejtimin e partisë në një situatë të vështirë dhe arriti ta rrisë mbështetjen për rreth 60 mijë vota, kjo mbështetje ndërkohë ka rënë. Pa ndryshime të thella strukturore dhe një qasje të re politike, LDK-ja rrezikon të mbetet jashtë garës serioze politike.
Bashkëpunim me Vetëvendosjen?

Pas zgjedhjeve të mbajtura më 9 shkurt të vitit të kaluar, Abdixhiku në disa raste ka deklaruar se nuk do të ketë bashkëpunim me Vetëvendosjen.

Një muaj pas atyre zgjedhjeve ai tha:

“Nuk kemi pasur takim me asnjë parti politike në Kosovë, veçanërisht jo me partinë në pushtet. Nuk duam, nuk kemi bashkëpunim dhe nuk po punojmë për bashkëpunim me Vetëvendosjen”, ishte i qartë Abdixhiku atëherë në një konferencë për shtyp.

Edhe të tjerët në LDK mbetën konsekuentë ndaj këtij qëndrimi – nuk deshën t’i japin mbështetje as propozimit për formimin e qeverisë së Albin Kurtit, e as dy javë më vonë propozimit të Glauk Konjufcës. Mungoi mbështetja edhe për ligjet e propozuara, në radhë të parë buxheti, i cili ende pret deputetët e rinj që të votohet, ndërkohë që Kosova mbetet pa mjete të BE-së. Ndoshta pikërisht ky qëndrim kokëfortë ka kontribuar në rënien e mbështetjes për LDK-në, dhe disi edhe për partitë e tjera, përveç Vetëvendosjes.
Cilido qoftë shkaku, nga LDK-ja edhe para zgjedhjeve vinin sinjale se nuk do të ketë bashkëpunim me Vetëvendosjen. Megjithatë, kryetari i Prishtinës dhe bashkëpunëtor i afërt i Lumir Abdixhikut, Përparim Rama, më 13 janar deklaroi se do të “mbështeste çdo koalicion që është në interes të qytetarëve, edhe me Vetëvendosjen”, ndonëse me ta ka pasur përvoja të këqija.

Nëse kjo është një shenjë e ndryshimit të qëndrimit të LDK-së dhe të liderit të saj, mbetet për t’u parë. Sidoqoftë, fakt është se Vetëvendosjes për formimin e qeverisë nuk i janë më të domosdoshëm.
Njohja e ndërsjellë

Kur bëhet fjalë për marrëdhëniet me Serbinë, qëndrimi i Lumir Abdixhikut nuk dallon nga qëndrimet e liderëve të tjerë shqiptarë – procesi i dialogut Kosovë–Serbi duhet të përfundojë me një marrëveshje përfundimtare, e cila në thelb përfshin njohjen e ndërsjellë.

Edhe kur i jep mbështetje dialogut, ai nuk devijon nga ky qëndrim.

“LDK-ja mbështet zbatimin e të gjitha marrëveshjeve të arritura në këtë proces. Kosovës i nevojitet një marrëveshje e fokusuar në njohjen e ndërsjellë, sepse asnjë marrëveshje tjetër nuk garanton normalizimin e marrëdhënieve ndërmjet Kosovës dhe Serbisë”, ka deklaruar Abdixhiku.

Po ashtu, ai është përkrahës i anëtarësimit të Kosovës në BE dhe NATO.

Mbështetje ka dhënë edhe për pjesëmarrjen e Kosovës në Komitetin për Paqe, duke theksuar se kjo është “dëshmi e suksesit dhe përgjegjësisë së Kosovës dhe se çdo hap i përbashkët me SHBA-të e forcon sigurinë e saj dhe thellon aleancat strategjike”.

Ekonomist, i shkolluar në Britani, admirues i madh i Ibrahim Rugovës

Lumir Abdixhiku ka lindur më 22 prill 1983 në Prishtinë, ku ka përfunduar shkollën fillore, të mesme dhe studimet bazë në Universitetin e Prishtinës. Studimet master i ka përfunduar në vitin 2006 në fushën e politikave fiskale në Universitetin Staffordshire në Mbretërinë e Bashkuar.

Doktoraturën në ekonomi e ka përfunduar në vitin 2013 në Angli, pas një hulumtimi katërvjeçar në fushën e evazionit fiskal të ndërmarrjeve në vendet në tranzicion.
Që nga viti 2017 është anëtar i LDK-së dhe disa herë është zgjedhur deputet në Kuvendin e Kosovës.

Ka qenë kryetar i Komisionit parlamentar për buxhet dhe financa.

Për kryetar të LDK-së u zgjodh në vitin 2021, kur në moshën vetëm 38-vjeçare u bë lideri më i ri i saj. Në Kuvendin Zgjedhor mori mbështetjen e 191 delegatëve partiakë, ndërsa nënkryetari Lutfi Haziri fitoi besimin e 116 delegatëve dhe Besian Mustafa vetëm 16 vota.

Ai është kryetari i katërt i Lidhjes Demokratike të Kosovës, pas themeluesit Ibrahim Rugova, Fatmir Sejdiu dhe Isa Mustafa.

Nuk e fsheh se është admirues i madh i Ibrahim Rugovës, për të cilin me rastin e shënimit të 20-vjetorit të vdekjes së tij ka thënë se “mbetet shqiptari më i madh i të gjitha kohërave” dhe “njeriu që jo vetëm e realizoi ëndrrën historike të popullit të Kosovës për liri, pavarësi dhe demokraci, por krijoi një projekt të madh, më të madhin ndër shqiptarët e Kosovës”.