KUSH është KUSH – Sami Lushtaku: Kryetar i Skënderajt, i dënuar për krime lufte e më pas i liruar, në listën e zezë të SHBA-së

Ambulancat në fshatrat Banjë dhe Syriganë, të cilat funksiononin në sistemin serb, u mbyllën së fundmi nga inspektorati i komunës së Skënderajt me asistencën e Policisë së Kosovës, ndërsa kryetari i komunës së Skënderajt, Sami Lushtaku, deklaroi se ai personalisht ka urdhëruar mbylljen e tyre.

Lushtaku tha se ambulancat mund të rihapen pasi të integrohen në sistemin kosovar. Dje në këto objekte u vendosën tabela me simbole të Kosovës, por punonjësit nuk u kthyen në vendet e tyre të punës.

“Pas pranimit dhe verifikimit të informatave, kam lëshuar urdhër për mbylljen e dy ambulancave të mjekësisë familjare në dy vendbanime me komunitet joshumicë serb në Banjë dhe Syriganë, të cilat kishin filluar të funksiononin në mënyrë të paligjshme nën administrimin e strukturave paralele serbe, jashtë rendit kushtetues dhe juridik të Republikës së Kosovës. Ajo që gjetëm ishte e papranueshme: medikamente pa banderola dhe me afat të skaduar, përdorim i vulave dhe recetave mjekësore pa prezencën e mjekut dhe shumë shkelje të tjera që bien në kundërshtim me ligjet dhe protokollet shëndetësore. Kjo përveçse shkelje ligjore përbën rrezikim të drejtpërdrejtë për jetën dhe shëndetin e qytetarëve”, ka shkruar Lushtaku në Facebook.

Lista Serbe dhe drejtori i Zyrës për Kosovë dhe Metohi, Petar Petkoviq, i bënë thirrje bashkësisë ndërkombëtare të reagojë, por BE-ja dhe SHBA-ja deri më tani nuk janë prononcuar për mbylljen e këtyre ambulancave.

Kryetari i Skënderajt është anëtar i njohur i PDK-së. Gjatë viteve 1998 dhe 1999 ai ishte komandant lokal i UÇK-së në rajonin e Skënderajt. Ai u zgjodh kryetar komune në vitin 2013, kur edhe u ngrit aktakuzë ndaj tij për krime lufte.

I dënuar për krime lufte

Në vitin 2015, Lushtaku u dënua me 12 vjet burg për krime lufte ndaj popullsisë civile në një kamp të UÇK-së gjatë vitit 1998, si pjesëtar i të ashtuquajturit “Grupi i Drenicës”. Duke lexuar aktgjykimin, kryetari i trupit gjykues të Gjykatës Themelore në Mitrovicë, Dariusz Skejalicki, deklaroi se Lushtaku u dënua me 12 vjet burgim sepse, duke vepruar në mënyrë brutale, kishte marrë qëllimisht jetën e një shqiptari të paidentifikuar rreth 40 vjeç.

I liruar pas dy vitesh

Dy vjet pas vendimit të parë, i cili më pas u ul në shtatë vjet nga Gjykata e Apelit, ai u lirua nga të gjitha akuzat.

“Lushtaku nga sot është i lirë. Gjykata Supreme ka anuluar vendimin e gjykatës në Mitrovicë me të cilin ishte dënuar me 12 vjet burg për krime lufte gjatë viteve 1998 dhe 1999”, kishte deklaruar atëherë avokati i tij, Arian Koci.

Në listën e zezë të SHBA-së

Më 14 shkurt 2025, SHBA kishte 398 sanksione aktive ndaj individëve, kompanive dhe organizatave në Ballkanin Perëndimor. Në listën e zezë të Zyrës për Kontrollin e Pasurive të Huaja (OFAC) të Departamentit të Thesarit të SHBA-së vazhdon të figurojë edhe Sami Lushtaku.

Për zgjedhjet e dhjetorit

Lëvizja Vetëvendosje dhe lideri i saj, Albin Kurti, fituan zgjedhjet parlamentare falë diasporës nga Gjermania, Zvicra dhe Franca, deklaroi Sami Lushtaku pas zgjedhjeve të dhjetorit.
“Kjo është vendim i atyre që jetojnë në Gjermani, Zvicër dhe Francë. Nuk besoj se kjo është mendimi dhe vendimi i qytetarëve të Kosovës”, tha Lushtaku.