Përmbledhja e javës 52

Rishikimi i së kaluarës, ringjallja e plagëve të pashëruara dhe shikimet e cekëta drejt së ardhmes. Në këtë kërkim të fokusit, kaloi edhe një javë tjetër. Kush erdhi, kush e turbulloi edhe ujin tashmë të turbullt? Për këtë në Përmbledhjen e Javës.

Prej dekadash, asnjë mars në Kosovë nuk është i lehtë. As për shkak të kujtimeve, as për shkak të realitetit. As për shkak të gjurmëve të vuajtjes që ende shihen në çdo hap.

Gazetari Zhivojin Rakoçeviq përmbledh përshtypjen e përgjithshme të serbëve në Kosovë:
"Që nga ai moment i vitit 2004, ne jemi të burgosur të pogromit, dhe serbët në Kosovë dhe Metohi janë të burgosur të pogromit."

Të harrojnë të kaluarën, nuk munden. Të ecin përpara, duhet. Për këtë i kujtuan edhe këtë javë të ftuarit nga Brukseli. "Jemi këtu," thonë ata, "për të parë se nga mund të vazhdojmë më tej."

Pas takimeve të para në mandatin e ri, i dërguari i dialogut të BE-së Peter Sorensen thotë:

"Ne folëm se si mund të vazhdojë procesi. Si të ecim përpara."

Pika e fillimit për atë hap tjetër, zbuloi Sorensen, nuk është e njëjtë për të gjithë.

“Gjatë tre ditëve të vizitës, Sorensen u përpoq të kuptojë se çfarë planifikon të arrijë pala kosovare në kuadër të këtij dialogu”, interpreton mesazhet Dragisha Mijaçiq, koordinator i Konventës Kombëtare për Kapitullin 35.

Megjithëse qëndrimi ishte më i gjatë se sa pritej, ishte i pamjaftueshëm për të kuptuar thelbin e strategjisë, besojnë analistët. Disa lëvizje të Prishtinës ishin të pritshme, disa të tjera të nxitura nga momenti.

"Strategjia e Kurtit është të bëjë sikur ka vdekur," thotë Stefan Surlliq nga Fakulteti i Shkencave Politike. "Të bëjë sikur ka vdekur dhe të presë një kohë të re politike."

Një kohë e re në bashkëpunimin ushtarak rajonal u shpall këtë javë në Tiranë. Kush e dinte për këtë marrëveshje, kush u pajtua me të – këtë do ta shohim. Firmëtarët thonë se nuk ka arsye për pakënaqësi.

"Kjo nuk është asnjë mesazh armiqësor. Unë e di që problemet duhet kërkuar diku tjetër, por në këtë tekst nuk ka të tilla," deklaroi kryeministri kroat, Andrej Plenkoviq.

Në tekst ndoshta nuk duken, por në zbatimin e tij, shumëkush sheh probleme.

Kryetari i Komisionit për të Zhdukurit, Velko Odalloviq, vlerëson:

"Kjo deklaratë është një faktor destabilizimi, jo stabilizimi i rajonit."

Javët e reja, sipas rregullit, sjellin sfida të reja. Por ato të vjetrat mbeten të pazgjidhura. Kujtimi për zgjedhjet zbehet, ndërsa zgjidhja ende mungon.

"Duket se të gjithë janë të kënaqur me këtë raport forcash," vlerëson historiani Stefan Radojkoviq. "Opozita po pret të shohë se çfarë do të ndodhë, dhe as Kurti nuk ka ndonjë dëshirë të madhe për të përshpejtuar këtë proces," shton ai.

Që përshpejtimi nuk varet nga dëshira, e shohim muajt e fundit në pikëkalimin Merdare. Kamionët duan të lëvizin më shpejt, por nuk munden.

"Skanerët ende mungojnë, ndërsa radhët vetëm sa po rriten," thekson kryetari i Aleancës së Biznesit të Kosovës, Agim Shahini.

Se këto pajisje të paralajmëruara prej kohësh do të ndihmojnë, tashmë pak kush beson. Shoferëve u mbetet vetëm të presin, ose siç na tha një prej tyre pas 20 orësh pritjeje:

"Ne shpresojmë, por shpresa jonë nuk ndihmon!"