Ambasada e SHBA-së në Beograd: Ambasadori Gjuriq ka të drejtë

Pasi ambasadori i Serbisë në Uashington, Marko Gjuriq, deklaroi për “Euronews” se Amerika është bërë partneri numër 1 i Serbisë kur bëhet fjalë për shërbimet, se lufton çdo ditë për të ndryshuar imazhin e keq të Serbisë në SHBA dhe se pa SHBA Serbia nuk mund t'i mbrojë interesat e saj në mënyrën më të mirë, Ambasada Amerikane në Beograd njoftoi në Twitter se ambasadori Gjuriq ka të drejtë, dhe se marrëdhëniet mes dy vendeve po bëhen më të mira dhe më të forta çdo ditë e më shumë.

“Ambasadori Marko Gjuriq ka të drejtë. Kohët ndryshojnë dhe marrëdhëniet po ashtu, si e jona me Serbinë, që çdo ditë e më shumë po bëhen më të mira e më të forta. E kaluara është e kaluara, dhe fokusi ynë është në të ardhmen”, thuhet nga Ambasada Amerikane, bashkë me një pjesë të deklaratës së Gjuriqit.

Gjuriq tha për “Euronews” se lufton çdo ditë për të ndryshuar imazhin e keq të Serbisë në SHBA.

“Ne jemi ata që luftojmë për vëmendje pozitive, që luftojmë çdo ditë për të ndryshuar imazhin shumë të keq të viteve 1990, i cili u formua në mënyrë të pamerituar nga gabimet tona, dhe sigurisht që mund të ndryshojë”, ka thënë Gjuriq.

Ai tha se Amerika është bërë partneri numër 1 i Serbisë për sa i përket shërbimeve, fushë në të cilën në Serbi janë të punësuar më shumë se 36.000 njerëz.

“Kjo shifër dhe vlera e atij shkëmbimi do të rritet vazhdimisht dhe do të kontribuojë në PBB-në tonë. Larg që marrëdhënia jonë të jetë vetëm për ekonominë. SHBA është një vend që formëson tendencat globale të ekonomisë, politikës së sigurisë dhe gjithçka tjetër, si në rajonin tonë ashtu edhe në atë global. Duke pretenduar se ne mund të ekzistojmë dhe të mbrojmë interesat tona pa vepruar në mënyrë aktive ndaj tyre, do të na dëmtonte drejtpërdrejt vetëm ne”, ka thënë Gjuriq.