Baraliu: Brukseli është adresa për të gjitha mosmarrëveshjet mes Beogradit dhe Prishtinës

Profesori i së Drejtës Kushtetuese në Universitetin e Prishtinës Mazllum Baraliu ka thënë se Brukseli është adresa për të gjitha mosmarrëveshjet që kanë Beogradi dhe Prishtina, duke vlerësuar se “heroizëm është kur ulesh dhe bisedosh me kundërshtarin”.

“Mendoj se Vuçiq dhe Beogradi, Prishtina dhe Kurti dhe të tjerët që takohen atje në Bruksel duhet të zgjidhin atë që është e diskutueshme mes tyre. Çfarë është arritur dhe çfarë nuk është arritur. Në fakt, sipas përfaqësuesve të Prishtinës, gjithçka që u tha dhe u pajtua atje, por nuk u realizua, duhet të realizohet. Dhe tani, Beogradi thotë në kuptimin e kundërt. Kështu që ata duhet të pajtohen. Për këtë është dialogu, për këtë është biseda mes njerëzve dhe mes shteteve dhe politikanëve. Prandaj, në Bruksel, as njëra dhe as tjetra nuk ka nevojë të zbehet në një drejtim të papërgjegjshëm, të çorientojë popullin, sepse ndikon edhe në shëndetin mendor të njerëzve, e lëre më stabilizimin politik, orientimin dhe vendimin për të jetuar në një mjedis apo jo”, tha Baraliu.

Ai shtoi se përfaqësuesit e Beogradit dhe Prishtinës e kuptojnë se biseda me kundërshtarin është heroizëm i vërtetë.

“Duhet të flasësh heroikisht me kundërshtarin, ky është heroizëm dhe të bisedosh në tryezë, jo kështu, të çorientohesh per nevoja të brendshme. Nuk po flas vetëm për njërën palë, po flas për të dyja palët, për politikanët që të mos e çorientojnë opinionin publik dhe popullin”, tha Baraliu.

Duke komentuar synimin e Beogradit për të pezulluar të gjitha vendimet që janë marrë jashtë marrëveshjeve të Brukselit, ai mendon se kjo nuk është zgjidhje, por ajo duhet të kërkohet përmes marrëveshjes dhe pëlqimit të të dyja palëve.

“Nuk mund ta bësh për shtëpinë e dikujt, as për vëllain tënd, nuk mund t’i thuash do ta zgjidh kështu, nuk mund ta bësh kështu. Nuk mund të jetë nëse duam të jemi njerëz, siç na mëson feja, e lëre më siç duhet të bazohet në parime demokratike. Pra (masat) janë pa efekt, nëse nuk ka marrëveshje dhe nëse nuk ka pëlqimin e të dyja palëve. Për këtë është dialogu. Por ku është ai dialog? Ai në fakt u ndal”, përfundoi Baraliu.