BE: Na vjen keq që partitë nuk arritën të gjejnë një figurë bashkuese për kandidat për president

Nga Zyra e Bashkimit Evropian në Prishtinë kanë vlerësuar për Kosovo online se u vjen keq që partitë politike nuk arritën të gjejnë një figurë bashkuese për kandidat për president, gjë që, siç theksojnë, ka çuar në faktin që Kosova po shkon drejt zgjedhjeve të treta të përgjithshme në më pak se 18 muaj.

Nga Bashkimi Evropian rikujtojnë se kanë bërë thirrje disa herë për të gjithë aktorët politikë që të sigurojnë stabilitet institucional.

“Na vjen keq që partitë politike nuk arritën të gjejnë një figurë bashkuese si kandidat për president, që do të thotë se Kosova tani po shkon drejt zgjedhjeve të treta të përgjithshme në më pak se 18 muaj”, thuhet në përgjigje.

Nga Bashkimi Evropian theksohet se është urgjente që Kosova të forcojë dialogun ndërpartiak, në mënyrë që të sigurohet funksionimi efikas i institucioneve dhe të mos humben mundësitë që janë në interes të qytetarëve, përfshirë edhe ato në kuadër të Planit të rritjes.

“Bashkimi Evropian ka treguar gatishmëri për të vazhduar mbështetjen dhe bashkëpunimin me Kosovën në të gjitha fushat përmes angazhimit të vazhdueshëm, përfshirë zbatimin e Agjendës Reformuese të Kosovës dhe dialogun për normalizim me ndërmjetësimin e BE-së”, përfundon njoftimi.