Bishevac: Duan me çdo mënyrë të frikësojnë dhe të dëbojnë serbët nga Kosova

Anëtari i Kryesisë së Listës Serbe, Nemanja Bishevac, vlerësoi se manifestimet e organizuara në Mitrovicën e Veriut gjatë periudhës së fundit, jashtë vullnetit të popullit serb, kishin për qëllim frikësimin dhe dëbimin e popullit serb nga Kosova, veçanërisht nga veriu.

Bishevac për Kurir TV tha se ka ardhur fundi i sundimit të kryetarëve aktualë në veri.

“Ky është vetëm fundi i sundimit të kryetarëve aktualë. Ata duan me çdo mënyrë të frikësojnë dhe të dëbojnë popullin serb nga Kosova e Metohia, sidomos nga veriu. Presioni ndaj sportit dhe kulturës po vazhdon prej vitesh. Klubeve serbe u ndalohet hyrja në Kosovë, ndërsa klubet nga Kosova nuk mund t’i zhvillojnë ndeshjet e tyre në vendbanimet e veta. Sa i përket kulturës, kemi pasur mbylljen e bibliotekave, qendrave kulturore…”, kujtoi Bishevac.

Ai theksoi se situata kulmoi me mbajtjen e fundit të festivalit të xhazit dhe turneut të basketbollit.

Sipas tij, festivali u mbajt në praninë e vetëm 12 personave, ndër të cilët ishin kryetari Erden Atiq me sigurimin e tij, dhe kishte më shumë policë se sa publik.

“Pikërisht për shkak të atij festivali u penguam të organizonim festimet tradicionale të Mitrovicës. Është një traditë shumëvjeçare. U përballëm edhe me kërcënime se do të arrestoheshim për shkak të kundërshtimit të pranisë së kryekomunarit. Por populli ynë tregoi unitet dhe vendosmëri të fortë për të qëndruar”, nënvizoi Bishevac.

Duke folur për vëllezërit Milliq, emrin e të cilëve mban sheshi ku u organizua turneu i basketbollit gjatë fundjavës, Bishevac kujtoi se ata janë të gdhendur në historinë e Mitrovicës së Veriut, pasi me jetët e tyre paguan çmimin për mbrojtjen e tokës së tyre.

“Dhe pikërisht në hapësirën e dedikuar atyre – shqiptarët organizuan një turne basketbolli”, konstatoi Bishevac, duke shtuar me ironi se “shqiptarët njihen si komb basketbolli”.

Ai deklaroi gjithashtu se në turneun e basketbollit në Mitrovicën e Veriut kishte më shumë pjesëtarë të policisë dhe të sigurimit të ministrit në mandat teknik, Xhelal Sveçla, sesa vetë pjesëmarrës.

Duke iu përgjigjur konstatimit se provokime të ngjashme do të bëhen gjithnjë e më të shpeshta, Bishevac tha se si Lista Serbe ashtu edhe i gjithë populli serb janë të përgatitur për këtë.

„Kam marrë informacion se në sallën sportive do të zëvendësohen karriget dhe se në vend të atyre të kuqe, blu dhe të bardha do të vendosen karrige të gjelbra. Është e qartë se kryetarëve të komunave u nxiton të shkatërrojnë gjithçka që është serbe në këto hapësira. Por ndoshta pas këtyre tre vjetëve e gjysmë kanë mësuar se popullin serb nuk është aq e lehtë ta frikësosh,“ përfundoi Bishevac.