Çupi: Kandidati i Shqipërisë nuk u zgjodh në krye të OSBE-së për shkak të Greqisë

Analisti nga Tirana, Frok Çupi, vlerëson se Igli Hasani, ministri i Punëve të Jashtme të Shqipërisë, i cili ishte kandidati i këtij vendi për sekretar të përgjithshëm të OSBE-së, nuk u zgjodh në këtë pozicion, pasi Greqia vitet e fundit, në çdo rast, përpiqet të pengojë Shqipërinë që të përfshihet në nivele të larta të organizatave të tilla ndërkombëtare.

"Kjo nuk ndodhi sepse ministri i Punëve të Jashtme të Shqipërisë është një figurë e panjohur; përkundrazi, ai vjen nga fusha e të drejtave të njeriut dhe nga OSBE. Problemi këtu është Greqia," deklaroi Çupi për Kosovo online.

Javën e kaluar, Këshilli i Ministrave të Punëve të Jashtme të OSBE emëroi zyrtarë të rinj të rangut të lartë të organizatës, duke përfshirë Feridun Sinirlioglu nga Turqia si sekretar të përgjithshëm dhe Maria Telalian nga Greqia si drejtuese të Zyrës për Institucionet Demokratike dhe të Drejtat e Njeriut (Odihr).

“Për momentin duket se problemet mes Shqipërisë dhe Greqisë nuk janë aq të mëdha dhe situata nuk është aq e tensionuar, të dyja qeveritë janë të kujdesshme që të mos vazhdojnë me diskutime të ashpra. Megjithatë, Greqia është e vendosur të pengojë Shqipërinë në rrugën e saj drejt integrimit europian. Ky është një kërcënim për Ballkanin Perëndimor që vjen nga jashtë Ballkanit Perëndimor. Greqia sillet në këtë mënyrë sepse vitet e fundit ka humbur rolin e saj drejtues në Ballkan, për këtë arsye ka një kompleks inferioriteti në raport me shtetet e tjera ballkanike që nuk janë anëtare të Bashkimit Evropian, si Shqipëria, Serbia apo Mali i Zi, por të cilat po i afrohen anëtarësimit në Union dhe kjo është reflektuar në zgjedhjet në Osbe”, beson Çupi.

Për atë se çfarë mund të bëjnë Greqia dhe Turqia për Ballkanin Perëndimor nga pozicionet e tyre në OSBE, Çupi thotë se përgjigja nuk mund të jetë plotësisht pozitive, sepse të dyja këto vende nuk dallohen në respektimin e të drejtave të njeriut. Siç thekson ai, Greqia ka një numër të madh problemesh me minoritetet në vendin e saj.