Daçiq për vendimin e Komisionit Politik të APKE: Shkelje e interesave kombëtare dhe shtetërore të Serbisë

Ministri i Punëve të Jashtme të Serbisë, Ivica Daçiq, ka thënë se vendimi i Komisionit Politik të Asamblesë Parlamentare të Këshillit të Evropës për rekomandimin për pranimin e Kosovës në anëtarësim në Këshillin e Evropës paraqet shkelje të drejtpërdrejtë të interesave shtetërore, si dhe shkelje të integritetit territorial të Serbisë, raporton Pink.

Daçiq thotë se nuk është dashur të bëhet kaq urgjentisht dhe shton se me sa duket dikush ka gjykuar se është e papërshtatshme për Prishtinën që dikush është nën kritikë dhe se është koha për të bërë presion ndaj Serbisë, në mënyrë që diçka të zgjidhet para zgjedhjeve në Amerikë.

"Nuk mund ta zgjidhësh çështjen e statusit të Kosovës në një mënyrë, e pastaj të zgjidhësh çështjen e Ukrainës në një mënyrë tjetër. Ky vendim paraqet shkelje të drejtpërdrejtë të interesave tona kombëtare dhe shtetërore, shkelje të integritetit tonë territorial", tha Daçiq.

Ai shtoi se ky vendim është në kundërshtim me të gjitha parimet mbi të cilat mbështetet Këshilli i Evropës.

"Epo, ky është realiteti politik në të cilin jetojmë. Dy të tretat ose gjysma e atyre që votuan duhen për tema të tilla, ata që votojnë numërohen, ata që nuk votuan ose abstenuan nuk numërohen", tha Daçiq dhe shtoi se vendimi përfundimtar pritet në maj.

Daçiq po ashtu thotë se të gjitha vendimet për Serbinë merren jashtë të gjitha procedurave dhe rregullave.