Drecun: Armatosja e përshpejtuar e strukturave të sigurisë në Prishtinë është sfidë për Serbinë

Kryetari i Komisionit për Mbrojtje dhe Punë të Brendshme të Kuvendit të Serbisë, Millovan Drecun, deklaroi dje se armatosja e përshpejtuar e strukturave të sigurisë në Prishtinë, zhvillimi i industrisë ushtarake në Kosovë dhe bashkëpunimi gjithnjë e më intensiv me disa vende anëtare të NATO-s përbëjnë një sfidë serioze të sigurisë dhe gjeopolitike për Serbinë, transmeton RTV.

Drecun për Tanjug vlerësoi se qëllimi përfundimtar i Prishtinës është pozicionimi afatgjatë për anëtarësim në Aleancë.

Ai tha se ende nuk është saktësuar çfarë përfshin paketa më e re e ndihmës ushtarake të Shteteve të Bashkuara për Prishtinën, me vlerë 14 milionë dollarë, por se, sipas njoftimeve të deritanishme dhe marrëveshjeve të mëhershme, mund të supozohet se bëhet fjalë për një pjesë të dërgesave të armëve të dakorduara më parë.

Sipas tij, vetëm në bazë të listës së armatimit që po siguron Prishtina, në pjesën e sistemeve që ende nuk janë dorëzuar nga SHBA-ja, por janë dakorduar, përfshihen sistemet kundërtanke mobile “Javelin”, gjashtë obusë mobilë në automjete të kalibrit 105 milimetra dhe katër helikopterë.

“Transformimi i të ashtuquajturave Forca të Sigurisë së Kosovës ka hyrë në fazën e tretë, përfundimtare, dhe deri në vitin 2028 kjo formacion duhet të arrijë kapacitete të plota operative dhe të plotësohet maksimalisht”, tha Drecun.

Ai theksoi se edhe kjo fazë e tretë është afër përfundimit, si dhe se po intensifikohet plotësimi i numrit të pjesëtarëve të këtyre forcave, të cilët do të shtohen për rreth 500 pjesëtarë aktivë, krahas armatosjes shtesë dhe trajnimeve intensive.

Sipas tij, qëllimi është që këto forca të jenë plotësisht interoperabile me forcat e NATO-s, përkatësisht të organizohen, pajisen dhe trajnohen sipas standardeve të Aleancës.

Drecun tha se Prishtina paralelisht po punon edhe në zhvillimin e industrisë së vet ushtarake, duke rikujtuar se në Gjakovë tashmë janë ndarë 140 hektarë tokë për prodhim ushtarak.

Duke folur për mundësinë e anëtarësimit të Kosovës në NATO, Drecun tha se Prishtina aktualisht nuk mund të bëhet pjesë e saj për shkak të kundërshtimit të katër vendeve anëtare që nuk e njohin Kosovën, por paralajmëroi se ekzistojnë përpjekje që përmes presioneve politike dhe manovrave të ndryshme të hapet rruga për një skenar të tillë.

Ai vlerësoi se për Serbinë është veçanërisht e rëndësishme që në asnjë mënyrë të mos pranojë zgjidhje që mund të interpretohen si njohje “de fakto” e Kosovës.

Drecun gjithashtu vuri në dukje forcimin e bashkëpunimit ushtarak mes Kroacisë, Shqipërisë dhe Prishtinës, duke theksuar se aktivitetet dhe marrëveshjet e përbashkëta ushtarake e komplikojnë më tej situatën e sigurisë në rajon.

Ai veçoi posaçërisht rolin e Turqisë, për të cilën tha se ka ndikim të rëndësishëm në Ballkan dhe merr pjesë në pajisjen e forcave të sigurisë në Prishtinë, transmeton RTV.

Nga ana tjetër, Drecun vlerësoi se Serbia, pavarësisht kësaj, duhet të kujdeset për interesat e saj strategjike dhe, përkundër mospajtimeve, të vazhdojë zhvillimin e marrëdhënieve politike dhe ekonomike me Turqinë, si fuqi rajonale.

Duke folur për pozitën e Serbisë, ai theksoi se Beogradi duhet të vazhdojë forcimin e ekonomisë dhe kapaciteteve mbrojtëse, por edhe të mbetet i përkushtuar ndaj politikës së neutralitetit ushtarak.

Ai kujtoi se Serbia bashkëpunon me NATO-n përmes Partneritetit për Paqe dhe vlerësoi se një politikë e tillë është e rëndësishme për shkak të pozitës gjeopolitike të vendit.

“Serbia është e rrethuar nga shtete anëtare të NATO-s ose vende që bashkëpunojnë me atë Aleancë dhe duhet ta udhëheqë politikën e saj në mënyrë racionale, ndërsa prioriteti ynë është ruajtja e paqes, mbrojtja e interesave shtetërore dhe zgjidhja paqësore e çështjes së Kosovës dhe Metohisë”, tha Drecun.

Ai shtoi se Serbia nuk dëshiron të jetë faktor i destabilitetit në rajon dhe se pikërisht insistimi në dialogun politik përfaqëson kontributin e saj më të madh për ruajtjen e paqes në këto hapësira.