Gjuriq dhe Konrad diskutuan për integrimin evropian të Serbisë dhe zhbllokimin e dialogut ndërmjet Beogradit dhe Prishtinës

Ministri i Punëve të Jashtme i Serbisë, Marko Gjuriq, zhvilloi sot një takim me ambasadoren e Gjermanisë, Anke Konrad, ku u diskutua për marrëdhëniet dypalëshe ndërmjet dy vendeve, integrimin evropian të Serbisë, zhbllokimin e dialogut ndërmjet Beogradit dhe Prishtinës, Procesin e Berlinit, çështjet rajonale, si dhe tema të tjera me interes të përbashkët.

Duke theksuar se Gjermania është partneri më i madh tregtar i Serbisë dhe një nga donatorët më të rëndësishëm dypalësh, Gjuriq vlerësoi se marrëdhëniet janë të gjithanshme dhe të mira, si dhe se ekziston hapësirë dhe vullnet i fortë për avancimin e mëtejshëm të tyre në fushat e ekonomisë, energjetikës, arsimit, shkencës, inovacionit dhe digjitalizimit, njoftoi Ministria e Punëve të Jashtme e Serbisë.

Ministri falënderoi Gjermaninë për mbështetjen që i jep procesit të integrimit evropian të Serbisë dhe theksoi se Beogradi është maksimalisht i angazhuar për të përmbushur agjendën e reformave në afatin sa më të shkurtër.

Meqenëse ambasadorja Konrad po përfundon mandatin e saj në Beograd, Gjuriq e falënderoi për bashkëpunimin e deritanishëm dhe i uroi lumturi personale dhe shumë suksese në detyrën e re.