Gjuriq: Kongo parimisht respekton integritetin territorial të Serbisë; Gakos: Nuk kemi dilema për çështjen e Kosovës

Ministri i Punëve të Jashtme të Serbisë, Marko Gjuriq, i falënderoi sot Republikës së Kongos për mbështetjen parimore ndaj Serbisë sa i përket çështjes së Kosovës, duke theksuar se ky vend ka treguar se është një nga më parimorët në të gjithë kontinentin afrikan, por edhe në komunitetin ndërkombëtar në përgjithësi, kur bëhet fjalë për respektimin e integritetit territorial. Ministri i Punëve të Jashtme, Frankofonisë dhe Diasporës së Republikës së Kongos, Jean-Claude Gakos, theksoi se vendi i tij nuk ka asnjë paqartësi apo dilemë në lidhje me çështjen e Kosovës dhe se nuk ka “gjeometri të ndryshueshme” – që t’u njihet disave ajo që nuk respektohet për të tjerët.

„Kjo është veçanërisht e rëndësishme në një kohë kur shohim pasojat e veprimeve të njëanshme në marrëdhëniet ndërkombëtare dhe shkeljen e së drejtës ndërkombëtare dhe Kartës së OKB-së“, tha Gjuriq në konferencën e përbashkët për shtyp me ministrin e Punëve të Jashtme, Frankofonisë dhe Diasporës së Republikës së Kongos, Jean-Claude Gakos.

Gjuriq theksoi se edhe në kontinentin evropian shihet se ky parim, kur respektohet – ruan paqen, por kur nuk respektohet – sjell vdekje, destabilitet dhe vuajtje.

„Jemi mirënjohës që duke mbrojtur qëndrimin tonë, mbroni edhe të drejtën dhe rendin ndërkombëtar, por gjithashtu na ndihmoni të ruajmë diçka që është shpirti i popullit tonë. Kosova dhe Metohia është shpirti i popullit serb“, theksoi shefi i diplomacisë serbe.

Ai përcolli se edhe gjatë bisedimeve me kolegun nga Republika e Kongos i ka treguar për pozitën jashtëzakonisht të vështirë të popullit serb në Kosovë dhe për vuajtjet që kalon, i diskriminuar vetëm për shkak të përkatësisë kombëtare dhe fetare.

Ministri Gjuriq gjithashtu theksoi se bashkëpunimi i Serbisë me Republikën e Kongos është i orientuar drejt së ardhmes dhe drejt projekteve konkrete ekonomike dhe të bashkëpunimit në fushën e mbrojtjes, arsimit, pasi ekziston dëshira e ndërsjellë që sa më shumë qytetarë të Serbisë të vizitojnë Kongon dhe anasjelltas.

„Jemi shumë të interesuar dhe në muajt e ardhshëm do të fillojmë me proceset institucionale, komitetet për bashkëpunim ekonomik, do të pasojnë marrëveshje të ndryshme për bashkëpunim dypalësh me qëllim zgjerimin e bazës sonë kontraktuale“, tha Gjuriq.

Ai u uroi mirëseardhje delegacionit të Republikës së Kongos në Ekspo 2027, një ekspozitë ndërkombëtare që do të mbledhë më shumë se 130 shtete.

„Dëshirojmë që edhe Republika e Kongos, si një nga partnerët kyç në kontinentin afrikan, të ketë një vend shumë të rëndësishëm në këtë manifestim. Evropa dhe bota mund të mësojnë shumë nga Republika e Kongos, si në fushën e shkencës, kulturës, artit. Kjo do të jetë një mundësi fenomenale që të prezantohemi me njëri-tjetrin në një dritë tjetër“, tha ministri Gjuriq.

Shefit të diplomacisë së Republikës së Kongos i përcolli mesazhin që në Serbi të ndihet si në shtëpinë e vet.

„Ju këtu jeni në shtëpinë tuaj. Interesat tuaja janë edhe tonat dhe jemi gjithmonë të gatshëm t’i mbështesim“, theksoi Gjuriq.

Ai shtoi se në bisedën e tyre bilaterale është diskutuar edhe për kandidaturën e përfaqësuesit të Republikës së Kongos për drejtor të UNESCO-s.

„Diskutuam edhe për mënyrat se si ta përmirësojmë bashkëpunimin në sferën multilaterale, i cili, jam i sigurt, vetëm do të zhvillohet dhe të rritet“, përfundoi ministri Gjuriq.

Jean-Claude Gakos: Nuk kemi dilema për çështjen e Kosovës, nuk ka "gjeometri të ndryshueshme"

Ministri i Punëve të Jashtme, Frankofonisë dhe Diasporës së Republikës së Kongos, Jean-Claude Gakos, theksoi se vendi i tij nuk ka asnjë paqartësi apo dilemë për çështjen e Kosovës.

“Duke qenë në Beograd, dua edhe një herë të nënvizoj qëndrimin e Qeverisë së Republikës së Kongos, e cila nuk ka asnjë paqartësi apo dilemë për krahinën serbe të Kosovës. Ne angazhohemi për respektim të rreptë të integritetit territorial të shteteve. Nuk mund të ketë gjeometri të ndryshueshme – që të njihet për disa, ndërsa për të tjerët të mos respektohet”, nënvizoi Gakos.

Ai shtoi se për këtë arsye pozicioni i Kongos dhe i shumë vendeve të tjera afrikane është i qartë, dhe kjo është mbështetje për Serbinë.

“Nuk ka asnjë paqartësi për këtë çështje”, tha ai sërish.

Gakos bëri të ditur se me ministrin Gjuriq ka biseduar për marrëdhënie bilaterale dhe theksoi se qytetarët në Serbi nuk e njohin mirë Kongon.

„Ne jemi një vend i mbuluar me pyje dhe kemi dalje në det. Prodhim naftë, nuk kemi shumë, por e shfrytëzojmë për zhvillimin tonë. Ne jemi një vend i hapur ku janë të pranishme shumë shtete. Serbia është një nga të paktat vende që nuk është e pranishme në Kongon. Personalisht garantoj se Serbia ka vendin e saj në Kongo, por edhe më gjerë se kaq“, tha Gakos.

Ai shtoi se Kongo mund të bëhet porta hyrëse e Serbisë në Afrikën Qendrore.

Gakos theksoi si përparësi marrëdhëniet e shkëlqyera që të dyja vendet i kanë pasur që nga koha e Josip Broz Titos.

„Qytetarët tanë nuk mund ta harrojnë mbështetjen që i gjithë kontinenti afrikan e ka marrë nga Jugosllavia. Ne ju jemi mirënjohës për atë mbështetje, si për pavarësinë, ashtu edhe për procesin e emancipimit të vendeve tona“, shtoi Gakos.

Ai theksoi se ka projekte edhe në fushën e mbrojtjes dhe kujtoi se shumë oficerë nga Kongo janë shkolluar në Serbi.

Shtoi gjithashtu se pati një shkëmbim konstruktiv edhe me ministrin e Arsimit, me të cilin u ra dakord për bashkëpunim të mëtejshëm në fushën e bursave.

„Arsimi është diçka shumë e rëndësishme për vendet që synojnë zhvillimin, dhe Serbia është partner i vërtetë i Kongos në këtë fushë“, tha Gakos.

Ai theksoi se e shoqëronte edhe një ekspert i madh i UNESCO-s, Eduard Matoko, kandidat i Kongos për kryetar të kësaj organizate.

„Zoti Matoko ndoqi me shumë vëmendje ekspozenë e ministrit për rrezikimin e trashëgimisë kulturore të UNESCO-s në Kosovë dhe Metohi. I thashë atij se ende nuk është zgjedhur, por se një nga çështjet me të cilat do të merret fillimisht do të jetë pikërisht mbrojtja e kësaj trashëgimie. Nuk mund të tolerojmë që lokacione kaq të vlefshme, të lëna për kujtim, të shkatërrohen“, tha Gakos.

Ai shtoi se Matoko e njeh shumë mirë UNESCO-n, pasi ka punuar aty për shumë vite.

„Vlerësojmë se kur UNESCO po kalon nëpër një periudhë të vështirë, jo vetëm ajo, por i gjithë sistemi i OKB-së, kur kemi edhe tërheqjen e SHBA-së që do të ketë pasoja të mëdha financiare, është e nevojshme që në krye të saj të vijë dikush që e njeh shumë mirë këtë institucion. Prandaj u propozojmë miqve tanë serbë që ta mbështesin këtë kandidaturë“, tha Gakos.