Gjuriq me Okamurën për dialogun dhe situatën e serbëve në Kosovë
Ministri i Punëve të Jashtme i Republikës së Serbisë, Marko Gjuriq, gjatë vizitës së tij në Republikën Çeke, zhvilloi sot një takim me kryetarin e Dhomës së Deputetëve të Parlamentit të këtij vendi, Tomio Okamura, ku u diskutua për përmirësimin e marrëdhënieve bilaterale, forcimin e bashkëpunimit parlamentar, si dhe dialogun me Prishtinën dhe pozitën e serbëve në Kosovë, njoftoi Ministria e Punëve të Jashtme.
Gjuriq theksoi se marrëdhëniet mes Serbisë dhe Çekisë karakterizohen nga miqësia e sinqertë dhe lidhjet e ngushta mes dy popujve, duke nënvizuar se Çekia është një partner i rëndësishëm i politikës së jashtme për Serbinë. Ai theksoi se Serbia është e përkushtuar për të forcuar bashkëpunimin me përfitim të ndërsjellë dhe për të intensifikuar dialogun politik në të gjitha nivelet.
Gjuriq shprehu mirënjohje për mbështetjen e vazhdueshme të Çekisë në rrugën evropiane të Serbisë, e cila përfaqëson një nga prioritetet strategjike të vendit.
Duke folur për bashkëpunimin ekonomik, ai theksoi zhvillimin e tij dinamik në vitet e fundit dhe rritjen e investimeve çeke në tregun serb.
Ai nënvizoi se Serbia është një shtet ekonomikisht i qëndrueshëm, i cili gjatë dekadës së fundit ka më shumë se dyfishuar produktin e brendshëm bruto dhe ka krijuar një klimë të favorshme për tërheqjen e investimeve të huaja.
Sa i përket situatës aktuale në Kosovë, Gjuriq raportoi për pozitën e vështirë të serbëve dhe shtoi se Beogradi është i përkushtuar ndaj dialogut, por njëkohësisht do të mbrojë me vendosmëri interesat e tij kombëtare.
Duke pasur parasysh rëndësinë e forcimit të mëtejshëm të dialogut parlamentar, shefi i diplomacisë serbe shprehu kënaqësi për vizitën e ardhshme të kryetarit të parlamentit çek në Serbi, me ftesë të kryetares së Kuvendit Popullor të Serbisë, Ana Brnabiq. Ai shtoi se formimi i Grupit Parlamentar të Miqësisë me Çekinë konfirmon edhe më tej përkushtimin për zhvillimin e bashkëpunimit ndërparlamentar.
komentet