Gjuriq me Pierce dhe Balakrishnan për avancimin e bashkëpunimit me Britaninë e Madhe dhe Singaporin

Ministri i Punëve të Jashtme i Republikës së Serbisë, Marko Gjuriq, bisedoi në Nju Jork, gjatë sesionit të 81-të të Asamblesë së Përgjithshme të Kombeve të Bashkuara, me të dërguarën e posaçme të Mbretërisë së Bashkuar të Britanisë së Madhe dhe Irlandës së Veriut për Ballkanin Perëndimor, Karen Pierce, dhe me ministrin e Punëve të Jashtme të Republikës së Singaporit, Vivian Balakrishnan.

Gjuriq bisedoi me Pierce për marrëdhëniet dypalëshe, temat aktuale dhe mundësitë për avancimin e mëtejshëm të bashkëpunimit rajonal, thuhet në njoftimin e Ministrisë së Punëve të Jashtme të Serbisë.

Siç shtohet, me këtë rast ai theksoi se Republika e Serbisë mbetet e hapur për fazat e reja të bashkëpunimit dypalësh që do të pasojnë, ndërsa në veçanti nënvizoi se Republika e Serbisë vazhdon të jetë fuqishëm e përkushtuar ndaj ruajtjes së paqes dhe stabilitetit në rajon.

Gjuriq u takua në Nju Jork edhe me ministrin e Punëve të Jashtme të Republikës së Singaporit, Vivian Balakrishnan, ndërsa gjatë bisedës theksoi interesimin e Serbisë për intensifikimin e mëtejshëm të bashkëpunimit dypalësh me Singaporin, duke rikujtuar themelet e ndërtuara gjatë periudhës së bashkëpunimit intensiv në kuadër të Lëvizjes së të Painkuadruarve.

Sipas tij, forcimi i dialogut politik dhe intensifikimi i shkëmbimit të vizitave në nivel të lartë dhe më të lartë do t’i jepnin një shtysë shtesë zhvillimit të bashkëpunimit dypalësh dhe forcimit të lidhjeve ndërmjet dy vendeve.

Duke folur për marrëdhëniet ekonomike, siç thuhet në njoftimin e Ministrisë së Punëve të Jashtme të Serbisë, Gjuriq shprehu gatishmërinë e Serbisë për intensifikimin e bashkëpunimit ekonomik dhe investues, si dhe për përcaktimin e fushave konkrete në të cilat ekzistojnë mundësi reale për projekte dhe investime të reja.

Ai veçoi në mënyrë të posaçme rëndësinë e përvojave të Singaporit në fushën e inovacioneve dhe sigurisë kibernetike, duke vlerësuar se pikërisht këto fusha përbëjnë hapësirë për lidhje konkrete dhe shkëmbim të njohurive dhe përvojave ndërmjet dy vendeve.

Gjuriq shprehu kënaqësinë që 60-vjetori i vendosjes së marrëdhënieve diplomatike ndërmjet Serbisë dhe Singaporit do të shënohet në vitin e mbajtjes së Ekspozitës së Specializuar Expo 2027 në Beograd dhe e ftoi ministrin Balakrishnan të vizitojë Serbinë gjatë zhvillimit të ekspozitës, duke vlerësuar se vizita e tij zyrtare do të përbënte një kontribut të rëndësishëm në shënimin e këtij jubileu të rëndësishëm dhe në forcimin e mëtejshëm të marrëdhënieve ndërmjet dy vendeve.