Gjuriq u takua me ministrin e Jashtëm të Malit, e falënderoi këtë vend për mbështetjen ndaj sovranitetit të Serbisë

Ministri i Punëve të Jashtme i Serbisë, Marko Gjuriq, u takua sot me ministrin e Punëve të Jashtme dhe Bashkëpunimit Ndërkombëtar të Republikës së Malit, Abdulaje Diop, i cili kryeson delegacionin e këtij shteti afrikan në shënimin e 65-vjetorit të Konferencës së Parë të Lëvizjes së Vendeve të Painkuadruara në Beograd, njoftoi MPJ e Serbisë. Gjatë bisedës, Gjuriq falënderoi Republikën e Malit për mbështetjen parimore ndaj sovranitetit dhe integritetit territorial të Republikës së Serbisë.

Duke i uruar mirëseardhjen, Gjuriq shprehu kënaqësinë për mundësinë e takimit dhe bisedës në Beograd, i cili në ditët në vijim do të jetë mikpritës i një tubimi të rëndësishëm të bërthamës historike të Lëvizjes së të Painkuadruarve, thuhet në komunikatë.

Gjuriq theksoi gjithashtu se në Serbi 1 shtatori shënohet si Dita e të Painkuadruarve, në përkujtim të rolit historik të Beogradit në themelimin e kësaj lëvizjeje dhe si konfirmim i përcaktimit të Serbisë për t’i qëndruar besnike politikës së paqes, bashkëpunimit dhe barazisë mes popujve.

“Shefi i diplomacisë serbe theksoi se Serbinë dhe Malin i lidhin dekada marrëdhëniesh të mira, duke pasur parasysh se Serbia trashëgon politikën jugosllave ndaj vendeve afrikane, me të cilat dëshiron të forcojë lidhjet politike, ekonomike, arsimore dhe kulturore. Gjuriq falënderoi Republikën e Malit për mbështetjen parimore ndaj sovranitetit dhe integritetit territorial të Republikës së Serbisë”, thuhet në komunikatë.

Krahas forcimit të dialogut politik në të gjitha nivelet, shefi i diplomacisë serbe vuri në dukje edhe rëndësinë e bashkëpunimit ekonomik, përmes të cilit mund të përmirësohen marrëdhëniet e gjithanshme mes dy vendeve. U diskutua edhe për bashkëpunimin në fushat e bujqësisë dhe arsimit, i cili tashmë po zhvillohet me sukses përmes projektit të bursave për studentët e huaj “Bota në Serbi”.

Gjuriq i shprehu bashkëbiseduesit kënaqësinë që Mali do të prezantojë potencialet, kulturën dhe vizionin e vendit të vet në ekspozitën prestigjioze ndërkombëtare Expo 2027 në Beograd.