Grenell: Vjosa Osmani po gënjen, ajo do të thotë gjithçka për mbijetesë politike

I dërguari special i presidentit të Shteteve të Bashkuara të Amerikës, Donald Trump, për misione të posaçme, Richard Grenell, deklaroi se presidentja e Kosovës, Vjosa Osmani, gënjen kur ka thënë se administrata e Trump është administrata amerikane më e favorshme për Kosovën dhe kur pjesëmarrjen e Kosovës në Komitetin për Paqe e ka quajtur një arritje të madhe.

“Ajo gënjen. Ekipi Kurti–Osmani ka qenë një katastrofë dhe të gjithë e shohim qartë këtë. Ajo do të thotë çfarëdo për mbijetesën e saj politike”, shkroi Grenell në rrjetin social X.

Grenell e shkroi këtë në një postim ku bashkëngjiti pjesë nga intervista e Vjosa Osmanit për televizionin Syri, në të cilën ajo tha se administrata e Trump është administrata amerikane më pro-Kosovës që nga koha e George Bushit, kur Kosova shpalli pavarësinë.

Osmani theksoi se administrata e Bidenit ka kërkuar vazhdimisht lëshime nga Kosova në bisedimet me Serbinë, ndërsa administrata e Trumpit mbështet sovranitetin dhe integritetin territorial të Kosovës, si dhe anëtarësimin në NATO pa lëshime.

Duke folur për takimin e saj me sekretarin e shtetit Marco Rubio, Osmani tha se kanë diskutuar për krijimin e një plani konkret për njohjen e Kosovës nga vendet që nuk e njohin atë, si dhe për ndihmën që Kosova t’i bashkohet NATO-s.

Osmani gjithashtu e quajti pjesëmarrjen e Kosovës në Bordin e Paqes një arritje të madhe, duke thënë se liderë nga vendet që nuk e njohin Kosovën i kanë thënë se tani mund të shqyrtojnë njohjen e saj.
Ajo shtoi se e gjithë kjo është arritur pa u shpenzuar para për lobim.