Haxhiu liron nga detyra gjyqtarët serbë që kishin dhënë dorëheqje në vitin 2022

Ushtruesja e detyrës së presidentes së Kosovës, Albulena Haxhiu, shkarkoi sot nga detyra 18 gjyqtarë serbë, të cilët kishin dhënë dorëheqje në vitin 2022.

„Pas propozimit të Këshillit Gjyqësor të Kosovës, në përputhje me obligimet kushtetuese dhe ligjore, sot kam liruar nga detyra 18 gjyqtarë serbë, të cilët kishin dhënë dorëheqje në vitin 2022“, shkroi Haxhiu në Facebook.

Këshilli Gjyqësor i Kosovës, më 27 gusht, refuzoi kërkesën e gjyqtarëve serbë dhe të personelit gjyqësor për tërheqjen e dorëheqjeve dhe kthimin në sistemin gjyqësor, ndërsa ushtruesja e detyrës së presidentes së Kosovës, Albulena Haxhiu, e përshëndeti këtë vendim dhe paralajmëroi se do të ndërmerrte menjëherë masa për shkarkimin e tyre.