Hoxha: Kosova nuk ka përparuar në dialog dhe në çështjen e Asociacionit të Komunave aq sa pret BE-ja

Docenti në Universitetin e Agderit, Abit Hoxha, nuk pret që vizita e ardhshme në Kosovë e komisioneres evropiane për zgjerim, Marta Kos, e paralajmëruar deri tani jozyrtarisht, të sjellë ndryshime në raportin e BE-së ndaj Prishtinës, por që gjatë saj të përsëriten qëndrimet e njohura të Brukselit. Në sytë e BE-së, siç thekson ai, disa procese, si dialogu me Beogradin, nuk kanë përparuar aq sa pret Bashkimi.

“Nuk pres që gjërat të ndryshojnë, por të përsëriten qëndrimet politike të BE-së ndaj Kosovës, e kjo është se Kosova duhet të arrijë diçka që politikanët kosovarë e quajnë kushte, por nuk është kështu, ato nuk janë kushte, por përparim që Kosova duhet ta arrijë për veten e saj dhe jo për BE-në”, deklaroi Hoxha për Kosovo online.

I pyetur nëse BE-ja është e zemëruar me Kurtin, duke pasur parasysh deklaratat e disa zyrtarëve të saj, apo nëse po i jep mbështetje, duke marrë parasysh se vizita e Marta Kos, e cila pritet gjatë kësaj jave, do të ndodhë në kohën kur Kosova po përgatitet për zgjedhje të reja, Hoxha thotë se nuk bëhet fjalë për shqetësimin e BE-së për Kurtin, por për proceset që në sytë e BE-së nuk kanë përparuar aq sa pritet.

“Në dialog dhe në çështjen e Asociacionit të Komunave, si dhe në çështje të tjera, Kosova në sytë e BE-së në thelb nuk ka përparuar”, thekson ai.

Ai gjithashtu thotë se Brukseli i dërgon Kosovës mesazhe që nuk janë gjithmonë plotësisht të qarta.

“Gjithmonë ekziston njëfarë paqartësie me Brukselin, por mendoj se politikanët kosovarë në këtë skenar duhet ta kuptojnë se interpretimi më i mirë i Brukselit është gjithmonë përparimi drejt asaj që Brukseli pret që institucionet të bëjnë”, thekson bashkëbiseduesi ynë.