Hoxha: Nuk ka bllokadë të negociatave, iniciativa e Ramës dhe Vuçiqit nuk është kundër BE-së

Ministri për Evropën dhe Punët e Jashtme të Shqipërisë, Ferit Hoxha, deklaroi në një seancë dëgjimore në Komisionin për Politikë të Jashtme se nuk ka pengesa për vazhdimin e negociatave të vendit të tij me BE-në.

Hoxha iu referua edhe diskutimeve lidhur me artikullin e kryeministrit Edi Rama dhe presidentit të Serbisë Aleksandar Vuçiq për “Frankfurter Allgemeine Zeitung”, duke sqaruar se një iniciativë e tillë nuk është kundër Bashkimit Evropian, por pjesë e debatit politik dhe komunikimit në rajon.

Sipas tij, Shqipëria mbetet qartësisht e përkushtuar ndaj procesit të integrimit evropian dhe e harmonizuar me vijën strategjike të BE-së.

Hoxha hodhi poshtë pretendimet për bllokadë apo veto nga shtetet anëtare të BE-së, duke theksuar se procesi i anëtarësimit po zhvillohet normalisht dhe se nuk ekziston asnjë pengesë formale.

Ai theksoi se Shqipëria përparon mbi bazën e meritave dhe zbatimit të reformave, duke shtuar se rekomandimet e Komisionit Evropian në kuadër të raportit IBAR kanë qenë pozitive dhe mbështesin vazhdimin e procesit. Hoxha gjithashtu nënvizoi se qëllimi strategjik i vendit mbetet anëtarësimi i plotë në Bashkimin Evropian deri në vitin 2030, transmeton Euronews Albania.

“Nuk ka pasur dhe nuk ka bllokadë, nuk ka pasur dhe nuk ka veto nga asnjë shtet anëtar për procesin e anëtarësimit të Shqipërisë në BE”, deklaroi qartë Hoxha, duke shtuar se ky përparim pozitiv është konfirmuar edhe nga Delegacioni i BE-së në Tiranë.

Gjatë raportimit, Hoxha u ndal edhe te përparimi i Shqipërisë në procesin e negociatave, duke theksuar se vendi nga hapja e zero kapitujve në tetor 2024 ka kaluar në hapjen e të 33 kapitujve deri në nëntor 2025. Sipas tij, ky është një ritëm që tregon si gatishmërinë institucionale të Shqipërisë, ashtu edhe mbështetjen e institucioneve të BE-së për avancimin e vendit në procesin e integrimit.