KUSH është KUSH – Zejnulla Gashi: Nga polici deri te Kryeprokurori i Kosovës, pritshmëri të mëdha para tij

Prokurori me prejardhje nga Prizreni, me 26 vjet përvojë në sistemin e drejtësisë, Zejnulla Gashi, do të jetë Kryeprokuror i Kosovës për shtatë vitet e ardhshme, pasi dje mori zyrtarisht detyrën.

Gashi, që nga viti 2023, ka ushtruar detyrën e kryeprokurorit të Prokurorisë Themelore në Prishtinë.

Në fillim të karrierës së tij në sistemin e drejtësisë, ai punoi për pesë vjet si gjyqtar në Gjykatën Themelore në Prizren. Në vitin 2015 u emërua prokuror në Prokurorinë Themelore në Prizren, ku ushtroi edhe funksionin e zëvendëskryeprokurorit të kësaj prokurorie.

Ai ka punuar gjithashtu në Policinë e Kosovës, në Stacionin Policor në Prizren deri në vitin 2010, duke mbajtur edhe pozitën e shefit të Departamentit për Krime Ekonomike dhe Korrupsion.

Duke marrë detyrën, Gashi deklaroi dje se do të jetë prokuror i të gjithëve dhe se, së bashku me kolegët e tij, do të punojë për forcimin e sundimit të ligjit.

I pyetur nga gazetarët nëse emërimi i tij në këtë post ishte falë Lëvizjes Vetëvendosje, ai nuk iu përgjigj pyetjes.

Gashi u emërua në postin e Kryeprokurorit nga ushtruesja e detyrës së presidentes së Kosovës, Albulena Haxhiu, me propozim të Këshillit Prokurorial të Kosovës, ku në votim mori pesë vota "pro" për kandidaturën e tij.

Mediat në gjuhën shqipe, me rastin e emërimit të Gashit, rikujtojnë një episod nga koha kur Albulena Haxhiu ishte në krye të Ministrisë së Drejtësisë, ndërsa Gashi ishte kryeprokuror në Prishtinë. Ai atëherë, pa paralajmërim, kishte shkuar në zyrën e saj për t’i dhënë shpjegime lidhur me një hetim që po zhvillonte për dyshime për korrupsion ndaj ish-shefit të Sekretariatit të Këshillit Prokurorial të Kosovës, Llavdim Krasniqit. Krasniqi është nga i njëjti vend si Alban Krasniqi, bashkëshorti i Albulena Haxhiut. Sipas deklaratës që Haxhiu kishte dhënë atëherë në polici, ajo nuk e kishte ftuar Gashin në kabinetin e saj, ndërsa ai kishte sqaruar se rasti që po hetonte nuk kishte prapavijë politike.

Duke i dorëzuar të martën dekretin e emërimit, Haxhiu tha se posti i Kryeprokurorit është një nga shtyllat kryesore të sundimit të ligjit dhe mbrojtjes së rendit kushtetues. Lufta kundër krimit të organizuar, korrupsionit, ndjekja penale e kriminelëve të luftës, përdhunuesve dhe çdo forme tjetër të kriminalitetit, sipas saj, duhet të marrë një përgjigje të vendosur nga prokuroria.

Në mars të këtij viti, kur ishte ende kryeprokuror i Prokurorisë Themelore në Prishtinë, Gashi u pa në shoqërinë e politikanëve gjatë ndeshjes Sllovaki–Kosovë në stadiumin e Bratislavës.

Sipas fotografisë së publikuar nga kryetari i Prishtinës, Përparim Rama, Gashi ishte në tribunë së bashku me zëvendëskryeministrin Glauk Konjufca, liderin e partisë Guxo dhe kryetarin e Mitrovicës së Jugut, Faton Peci, ministrin e Kulturës, Rinisë dhe Sportit, Hajrulla Çeku, kryetarin e Drenasit, Ramiz Lladrovci, si dhe Përparim Ramën.

Me rastin e emërimit të Gashit si Kryeprokuror i Kosovës, Ambasada e Mbretërisë së Bashkuar në Kosovë vlerësoi se ky është një hap i rëndësishëm pas një periudhe disavjeçare gjatë së cilës kjo pozitë kishte mbetur e paplotësuar. Ata theksuan rëndësinë e forcimit të sistemit prokurorial në Kosovë dhe shprehën pritjen që prokuroria t’i kryejë detyrat e saj në mënyrë efektive dhe efikase, duke forcuar sundimin e ligjit dhe duke kontribuar në luftën kundër krimit të organizuar dhe korrupsionit, në interes të të gjithë qytetarëve.

Emërimin e Gashit e përshëndeti edhe Zyra e Bashkimit Evropian në Kosovë, e cila dje deklaroi se përpara tij është një mandat i përqendruar në garantimin e integritetit dhe llogaridhënies në prokurori, si dhe në luftën kundër korrupsionit në nivel të lartë dhe krimit të organizuar.

Ndryshe, Kosova ishte pa Kryeprokuror që nga viti 2022, kur përfundoi mandati i Aleksandër Lumezit.