Lajçak për dialogu: Nëse nuk gjendet një zgjidhje deri në vitin 2024, duhet të fillojmë nga e para

Burim: Reporteri

Përfaqësuesi i Bashkimit Evropian për dialogun ndërmjet Beogradit dhe Prishtinës, Miroslav Lajçak, tha për Politiko se niveli i mosbesimit mes dy palëve është më i lartë se kurrë më parë, se tensionet janë ende të larta dhe se është e rëndësishme që liderët e Kosovës dhe Serbia të fillojnë të krijojnë një atmosferë të përshtatshme për bisedime produktive për normalizimin e marrëdhënieve.

“Ajo që është me të vërtetë e rëndësishme tani është që të mos lejohet që situata të kthehet në një krizë tjetër dhe është e rëndësishme për liderët në Kosovë dhe Serbi që të nisin të krijojnë një atmosferë të përshtatshme për bisedime produktive për normalizimin e marrëdhënieve”, shtoi Lajçak.

Lajçak vë në dukje se afati i marsit ka për qëllim të përcjellë seriozitetin e arritjes së një marrëveshjeje.

"Të dy liderët janë të gatshëm të takohen - problemi është rezultati. Dy takimet e fundit ishin në rregull për sa i përket atmosferës, por vizionet e dy liderëve nuk u përputhën. Ka gjithmonë pritshmëri të mëdha nga këto takime", tha Lajçak.

Lajçak theksoi se cikli i përsëritur i tensioneve të ndjekura nga zgjidhje të përkohshme po i detyron negociatorët të angazhohen që "ta shuajnë zjarrin, pasi nuk mund të përqendroheni në normalizimin kur ka një krizë."

"Shpresoj që brenda një jave nuk do të përballemi me një krizë tjetër - ose mund të harrojmë normalizimin", tha ai.
Lajçak këmbëngul se koha aktuale është ideale për gjetjen e një zgjidhjeje dhe se nëse humbet momenti, mosmarrëveshja mund të zvarritet për dekada.

“Tani për tani ne kemi një strukturë shumë të favorshëm, kemi vëmendjen e lidershipit të lartë në SHBA dhe Bashkimin Evropian dhe kemi një shembull të bashkëpunimit BE-SHBA, kështu që kjo është një mundësi reale, diku deri në dhjetor 2023 ose në fillim të 2024. Nëse gjërat nuk janë bërë deri atëherë, ne do të duhet të fillojmë përsëri nga e para. Nëse i kthehemi krizës dhe përplasjeve, atëherë mund të harrojmë afatet”, theksoi Lajçak.