Lista Serbe: Bashkësia ndërkombëtare të rifillojë hetimet për krimin në Livadicë

Lista Serbe, me rastin e 25-vjetorit të sulmit në Livadicë ndaj autobusit të “Nish Express”, njoftoi se nuk do të heqë dorë nga kërkesa për drejtësi, duke e përshkruar këtë ngjarje si një nga krimet më të rënda dhe më monstruoze ndaj popullit serb në Kosovë.

“Atë ditë, me aktivizimin e një mine tokësore në rrugën magjistrale Nish–Prishtinë, nën shoqërimin e forcave ndërkombëtare të KFOR-it, u hodh në erë autobusi i parë nga kolona në të cilin ndodheshin serbë të zhvendosur që udhëtonin për në Graçanicë për në shërbimin përkujtimor. Në këtë sulm të tmerrshëm humbën jetën 12 persona të pafajshëm, ndërsa 43 të tjerë u plagosën. Viktima më e re ishte dyvjeçari Danilo Cokiq”, thuhet në komunikatë.
Shtohet se, përveç familjes Cokiq – Njegosh, Snezhana dhe i vogli Danilo – humbën jetën edhe Sunçica Pejçiq, Zhivana Tokiq, Slobodan Stojanoviq, Nenad Stojanoviq, Mirjana Dragoviq, Velko Stakiq, Milinko Kragoviq, Lazar Milkiq dhe Dragan Vukotiq.

“Këta emra janë një kujtesë e përhershme dhe dëshmi e vuajtjeve të popullit serb, por edhe simbol i pandëshkueshmërisë së krimeve ndaj serbëve. Fatkeqësisht, edhe ky përvjetor, si shumë të mëparshmit, kalon pa deklarata të qarta dhe të zëshme nga përfaqësuesit ndërkombëtarë, pa dënim të krimit dhe pa thirrje që përgjegjësit të gjenden dhe të ndëshkohen. Edhe pas më shumë se dy dekadash, familjet e viktimave dhe i gjithë populli serb presin drejtësi, ndërsa autorët dhe urdhërdhënësit e këtij akti terrorist nuk janë ndëshkuar në mënyrë adekuate”, thuhet nga Lista Serbe.

Lista Serbe më tej thekson se pa të vërtetën dhe drejtësinë nuk ka pajtim, as paqe të qëndrueshme, duke kërkuar veprim nga bashkësia ndërkombëtare.

“Kërkojmë nga bashkësia ndërkombëtare të marrë përgjegjësi, të rifillojë hetimet dhe të bëjë gjithçka që ky, si edhe shumë krime të tjera ndaj serbëve në Kosovë dhe Metohi, të zbardhen plotësisht. Në emër të të gjitha viktimave dhe familjeve të tyre, nuk do të heqim dorë nga kërkesa për drejtësi. Harresa nuk është dhe nuk do të jetë opsion”, thuhet në komunikatë.