Lista Serbe: Radomiroviq pranoi se ishte përgjegjës për djegien e autoveturave në veri

Lista Serbe sot u ka bërë thirrje institucioneve kompetente që të arrestojnë Radojica Radomiroviqin, pasi siç theksojnë, nga audioincizimi që është publikuar në rrjetet sociale, dëgjohet se ai është përfshirë në djegien e autoveturave në veri të Kosovës.

“Duke marrë parasysh audioincizimin që u shfaq në media dhe në rrjetet sociale dhe në të cilin mund të dëgjoni një rrëfim më se të qartë të Radoica Radomiroviqit se ekipi i tij është përgjegjës për djegien e autoveturave në veri të Kosovës dhe Metohisë, më saktësisht, për djegien e autoveturës së nënkryetarit të atëhershëm ilegal dhe jolegjitim të komunës së Hetemit, dhe bashkëpunëtores të atëhershme të Radomiroviqit, i bëjmë thirrje institucioneve kompetente që menjëherë ta arrestojnë Radoica Radomiroviqin dhe të zhvillojnë procedurat përkatëse penale”, thuhet në njoftimin e Listës Serbe.

Ata shtojnë se dihet se policia e Kosovës nuk ka bërë asgjë për të arrestuar përgjegjësit “që kanë përdorur opiume gjatë orarit të punës në ndërtesën e komunës, përveç forcave speciale të Kurtit dhe kryetarit të rremë”.

“I bëjmë thirrje komunitetit ndërkombëtar që të bëjë presion mbi institucionet e Kosovës dhe të ndjekë penalisht ata që janë përgjegjës për keqbërjet, për të cilat shokët e Kurtit u përpoqën të akuzojnë Listën Serbe dhe shtetin e Serbisë. Besojmë se ky presion është i domosdoshëm, aq më tepër që disa ambasada gjithmonë kanë dënuar djegien e autoveturave dhe kanë kërkuar zbulimin dhe ndëshkimin e përgjegjësve. Besojmë se kjo kërkesë është ende në fuqi”, theksojnë ata.

Ata thonë se duan të besojnë se favori që ka Radomiroviq nga kryeministri i Kosovës, Albin Kurti, nuk do t'i pengojë organet kompetente të përcaktojnë përgjegjësinë.

“Duam të besojmë se simpatia dhe mbështetja që Radoica Radomiroviq ka nga Albin Kurti nuk do t'i pengojë autoritetet kompetente që të hetojnë Radomiroviqin dhe të përcaktojnë përgjegjësinë. Sundimi i ligjit nënkupton që nuk ka të paprekshëm dhe se ligji vlen për të gjithë pavarësisht nga simpatitë e kryeministrit, ministrave apo diçka të ngjashme. Qytetarët e Leposaviqit, veçanërisht të lënduarit, duhet ta dinë se kush është zjarrvënës, i cili shkatërron pronën e qytetarëve të tjerë dhe se përgjegjësit duhet të dënohen dhe të kompensohen për dëmin”, thuhet në njoftim.