Mbrojtja e Kostiqit dhe Milloviqit: Bëmë gjithçka për të dëshmuar pafajësinë e tyre, presim vendim lirues

Mbrojtja e Zoran Kostiqit dhe Dragan Milloviqit, avokatët Predrag Milkoviq dhe Millosh Delleviq, theksuan se në fjalët e tyre përfundimtare kanë analizuar të gjitha pikat e aktakuzës për të dëshmuar pafajësinë e të akuzuarve dhe se shpresojnë në një vendim lirues.

Avokati Predrag Milkoviq në fjalën përfundimtare analizoi të tri pikat që në aktakuzë i ngarkohen Kostiqit.

“Pika e parë e aktakuzës e ngarkon atë se kinse ka marrë pjesë në masakrën ndaj familjes Ujkani në fshatin Reznik. Këtë pikë e ka konfirmuar vetëm një dëshmitar i cili nuk është dëshmitar okular. Ai ka disa njohuri të tërthorta dhe e njeh Zoranin vetëm rastësisht. Më saktësisht, ai e njeh vetëm që nga viti 2023. Ky dëshmitar në fund të shqyrtimit gjyqësor tha se nuk e ka parë Zoranin duke vrarë dikë dhe nuk e ka parë Zoranin duke dhënë urdhra ndaj askujt. Ai nuk mund të jetë dëshmitar okular dhe nuk mund të jetë provë relevante për të vërtetuar se Zorani e ka kryer ose ka qenë pjesë e ndonjë grupi që ka kryer masakrën”, tha Milkoviq.

Sa i përket pikës së dytë, ai theksoi se madje 15 dëshmitarë të dëgjuar nuk e kanë përmendur Kostiqin.

“Pika e dytë e aktakuzës ka të bëjë me dëbimin e civilëve shqiptarë në varrezat në Vushtrri. Asnjë nga 10-15 dëshmitarët që janë marrë në pyetje nuk e ka përmendur Zoran Kostiqin, as që e ka parë atë atë ditë atje, as që ka marrë pjesë në ngjarje të tilla. Sa i përket vrasjes së Shefki Dallkut, familja Dallku që u dëgjua këtu ka thënë qartë dhe saktë se Zoran Kostiq nuk është polici Kostiq që e ka vrarë vëllanë ose nipin e tyre. Ata kanë thënë shumë qartë se ky njeri që është i akuzuar këtu nuk është ai person. Sipas tyre, bëhej fjalë për një polic të ri të asaj kohe, rreth 25-30 vjeç, i cili e ka kryer atë”, shtoi Milkoviq.

Sa i përket pikës së tretë, Milkoviq theksoi se i dëmtuari ka ndryshuar dëshminë e tij.

“Sa i përket rrahjes së Vesel Latifit, gjykatës i kemi dorëzuar prova materiale që tregojnë se ku ka qenë Zorani më 24 maj dhe të dyja provat tregojnë se ai atë ditë ka qenë në Kurshumli dhe Prokuple, e jo në Vushtrri siç pretendon dëshmitari. Nga ana tjetër, kemi treguar deklarata të kundërta që dëshmitari i ka dhënë ndër vite. Në fakt, në vitin 2000 vetë dëshmitari, me iniciativën e tij, ka dhënë një deklaratë në gjykatën komunale në Vushtrri ku ka thënë se e ka rrahur një paramilitar me mbiemrin Krstiq, se kjo ka ndodhur më 19 maj dhe se lëndimet i ka marrë nga goditjet dhe shkelmat në vende të ndryshme në kokë dhe brinjë. Pas 24 vitesh ai thotë se kjo ka ndodhur më 24 maj dhe se e ka rrahur polici Kostiq, në këtë rast Zoran Kostiq, se lëndimet i ka marrë nga një mjet i fortë, se nuk e di vendin ku i ka marrë lëndimet dhe se është alivanosur nga goditjet nga pas. Pra, rreth pesë elemente ndryshojnë plotësisht në deklaratat e tij dhe në bazë të kësaj konsiderojmë se ai nuk është dëshmi e besueshme. Deklarata e tij nuk është provë e mjaftueshme për të vërtetuar dyshimet e bazuara për atë për çfarë prokuroria e akuzon”, tha avokati.

Ai theksoi se pret një vendim lirues.

“Mund të them si mbrojtës i Zoran Kostiqit se kemi bërë gjithçka për të dëshmuar pafajësinë, edhe pse kjo në fakt nuk është puna jonë; puna jonë nuk është të dëshmojmë pafajësinë, por puna e prokurorisë është të dëshmojë fajësinë. Megjithatë, e dini vetë sa të rënda dhe të ndërlikuara janë këto raste dhe sa dëshmitarë kanë kaluar këtu. Shpresoj për një vendim lirues dhe që shumë shpejt Zorani dhe unë të jemi në shtëpinë e tij në Priluzhe”, tha Milkoviq.

Avokati Milosh Delleviq tha se shumica e madhe e dëshmitarëve të prokurorisë e kanë mbrojtur Dragan Milloviqin sikur ta kishin vëlla.

“Pres një vendim lirues sepse shumica e madhe e dëshmitarëve të prokurorisë speciale e kanë mbrojtur me zemër Dragan Milloviqin. Siç thashë sot në fjalën përfundimtare, ata e mbrojtën sikur të ishte vëllai i tyre i lindur. Dragan Milloviq ka lëvizur lirshëm në Vushtrri pas luftës, madje kishte edhe miq atje nga fshati Kolo, kështu që kurrë nuk ka pasur probleme me shqiptarët. Siç thashë edhe në fund të fjalës përfundimtare, nëse ai nuk lirohet, atëherë kush do të lirohet”, pyeti Delleviq.

Vendimi në këtë rast pritet më 18 mars.