Pavuk: Qëndrimi i Sllovakisë ndaj Kosovës bazohet në respektimin e së drejtës ndërkombëtare

Ambasadori i Sllovakisë në Serbi, Mihail Pavuk, deklaroi se qëndrimi i Sllovakisë lidhur me mosnjohjen e Kosovës ka qenë gjithmonë parimor dhe i bazuar në respektimin e së drejtës ndërkombëtare, si dhe në parimin e sovranitetit dhe integritetit territorial.

Ai theksoi se kjo nuk është e rëndësishme vetëm për marrëdhëniet me Serbinë, por se pasqyron edhe mënyrën se si Sllovakia i sheh marrëdhëniet ndërkombëtare në përgjithësi.
Pavuk theksoi se, në një kohë kur shumë parime janë vënë në pikëpyetje, Sllovakia konsideron se për shtetet më të vogla është veçanërisht e rëndësishme të ekzistojë një sistem funksional ndërkombëtar i bazuar në rregulla dhe respekt të ndërsjellë.
“Në të njëjtën kohë, gjithmonë kemi theksuar qartë se zgjidhja duhet kërkuar përmes dialogut ndërmjet Beogradit dhe Prishtinës, prandaj ne mbështesim bisedimet që zhvillohen me ndërmjetësimin e BE-së. Ish-ministri ynë i Punëve të Jashtme, Mirosllav Lajçak, e ka udhëhequr këtë proces për vite me radhë dhe ne vazhdojmë të mbështesim edhe përpjekjet aktuale që dialogu të mbahet dhe të përmirësohet pavarësisht sfidave të shumta”, theksoi Pavuk.
I pyetur lidhur me faktin se në rastin e Grenlandës vendet evropiane theksojnë parimet e integritetit territorial dhe sovranitetit, dhe nëse mendon se zbatimi konsekuent i këtyre parimeve, përfshirë edhe rastin e Kosovës, do ta forconte kredibilitetin e BE-së, Pavuk tha se nuk mendon se është e drejtë të bëhen lidhje të drejtpërdrejta ndërmjet këtyre çështjeve të ndryshme, të cilat, sipas tij, në sipërfaqe mund të duken të ngjashme, por në thelb janë mjaft të ndryshme.
Ai theksoi se Sllovakia gjithmonë e ka mbrojtur fuqishëm parimin e sovranitetit dhe integritetit territorial njësoj në Kosovë, në kontekstin e Grenlandës, si dhe në Ukrainë.
“Nuk ka asnjë dyshim rreth parimit. Megjithatë, politika e jashtme gjithmonë përfshin edhe zgjedhje pragmatike dhe praktike; ajo nuk mund të bazohet vetëm në parime. Por sa më shumë vendime të merren në përputhje me parimet që i konsiderojmë të rëndësishme dhe që na forcojnë, aq më e fortë do të jetë edhe BE-ja, që është interesi ynë i përbashkët”, deklaroi ambasadori.
Duke folur për integrimet evropiane të Serbisë, Pavuk tha se Sllovakia e mbështet fuqishëm Serbinë në rrugën e saj evropiane dhe se lobon në Bruksel për përshpejtimin e këtij procesi.
Pavuk shtoi se Sllovakia konsideron se rruga evropiane është zgjedhja e duhur për Serbinë dhe se BE-ja duhet të bëjë maksimumin që çdo shtet anëtar dhe çdo kandidat të trajtohet në mënyrë të barabartë, ndërsa parimet e anëtarësimit në BE të zbatohen në mënyrë të njëjtë për të gjitha palët, raporton Telegraf.
“Ne ju inkurajojmë dhe ju ndihmojmë në këtë drejtim. Sepse kur të bashkoheni me BE-në, do të ketë presione të mëdha mbi ekonominë dhe të gjithë sistemin, dhe vendi duhet të jetë i përgatitur për t’i përballuar ato, përndryshe kjo mund t’i shkaktojë dëm. Prandaj përpiqemi t’ju jemi në ndihmë dhe Sllovakia lobon shumë në Bruksel që Serbia të ecë përpara në rrugën e klasterëve dhe në fusha të tjera. Për një kohë shumë të gjatë nuk ka pasur përparim dhe ne flasim shumë hapur se kjo duhet të ecë përpara shumë shpejt”, tha Pavuk.
Duke komentuar se në opinionin evropian po rriten presionet ndaj liderëve që ndjekin politika më të pavarura, Pavuk vuri në dukje se brenda BE-së ekziston një debat i gjallë për drejtimin e ardhshëm të zhvillimit dhe se është e natyrshme që shtetet anëtare të mos kenë gjithmonë qëndrime të njëjta për të gjitha çështjet.
Ai theksoi se Sllovakia, në disa tema, i shpreh hapur qëndrimet që qeveria i konsideron në interes të vendit, ndërkohë që njëkohësisht e mbështet fuqishëm BE-në, duke nënvizuar se anëtarësimi ka sjellë përfitime të mëdha dhe e ka transformuar vendin në dy dekadat e fundit.
“Qëllimi ynë është që Evropa të jetë një aktor i fortë dhe i barabartë në skenën globale, e jo objekt i garave gjeopolitike. Prandaj besojmë se, pavarësisht interpretimeve të ndryshme në publik, si Sllovakia ashtu edhe BE-ja mund të dalin më të forta nga këto debate”, përfundoi Pavuk.