Petar Petkoviq uroi Ditën e Shtetësisë së Serbisë: Të ruajmë KdheM si pjesë përbërëse të vendit tonë

Drejtori i Zyrës për Kosovën dhe Metohinë, Petar Petkoviq, uroi Ditën e Shtetësisë popullit serb dhe të gjithë qytetarëve të Serbisë në Kosovë, me mesazhin që të mbeten të përkushtuar dhe besnikë ndaj shtetit të tyre dhe që në këtë festë të madhe të forcojnë besimin në veten e tyre, në atdheun e tyre dhe, siç theksoi ai, në përpjekjen e përbashkët “që Kosovën dhe Metohinë ta ruajmë si pjesë përbërëse të vendit tonë dhe si burimin tonë të vërtetë kombëtar”.

Petkoviq theksoi  në Instagram se simbolika e Sretenjës në popullin serb është e pandashme nga etika kosovare dhe ideja se “Serbia pa Kosovën dhe Metohinë nuk mund të ketë themele të forta shtetformuese, ndërsa serbët identitet kombëtar dhe vetëdije”.

Ai rikujtoi se Kryengritja e Parë Serbe, si lëvizje shtetformuese, nuk do të ishte e mundur pa kujtesën e shtetësisë mesjetare serbe, duke theksuar se dashuria për lirinë gjatë gjithë historisë moderne të Serbisë ka mbajtur gjithmonë “vulën kosovare”.

“Sretenja është dita kur nderojmë paraardhësit dhe arritjet e tyre kombëtare, por edhe dita kur u premtohemi pasardhësve dhe konsolidohemi në qëllimin dhe dëshirën për t’u lënë atyre një shtet të rregulluar, të fortë dhe modern, të bazuar në themelet e Kushtetutës së parë serbe të vitit 1835”, theksoi Petkoviq.

Ai shtoi se për këtë arsye Serbia, duke investuar në vitet e fundit në Kosovë më shumë mjete sesa ka bërë ndonjëherë në historinë moderne, nuk investon vetëm në popullin e saj, por forcon edhe themelet e të gjithë ndërtimit shtetëror që ua lëmë fëmijëve tanë.

“Serbia do ta vazhdojë me vendosmëri edhe në të ardhmen përpjekjen e drejtë dhe të ndershme për ruajtjen e shtetit dhe identitetit serb, i cili është i pandashëm nga etika kosovare, sepse pikërisht ajo na jep forcë të vazhdojmë të zhvillohemi dhe të rritemi me vetëdije të qartë politike dhe kombëtare”, përfundoi Petkoviq.