Petkoviq: Duke i dëbuar serbët nga banesat e tyre në veri, Kurti po zbaton politikën e spastrimit etnik

Drejtori i Zyrës për Kosovë dhe Metohi, Petar Petkoviq, ka vlerësuar se kryeministri i Kosovës Albin Kurti nuk po pushon dhe vazhdon të zbatojë politikën e spastrimit etnik, me një vendim që kërkon dëbimin e serbëve nga banesat e tyre dhe vendosjen e shqiptarëve në veri të Kosovës.

“Kurti nuk po pushon, ai po bën gjithçka për të vazhduar politikën e tij të spastrimit etnik dhe ky vendim, që nënkupton se serbët po largohen nga banesat e tyre, është në këtë kuptim”, ka theksuar Petkoviq për RTS.

Petkoviq shpjegoi se Agjencia Kosovare e Verifikimit u dërgoi njoftime serbëve që kanë në pronësi apartamentet dhe që i kanë blerë ato nga kompani si Trepça për dekada me radhë, me kërkesë për t'u larguar, duke deklaruar se nëse nuk e bëjnë këtë, do të dëbohen me forcë.

Siç thotë ai, Zyra për Kosovë dhe Metohi ka dërguar letra në adresa të shumta.

“Ne po bëjmë gjithçka përmes kanaleve diplomatike për të ndaluar atë vendim, por më duhet të them se kjo agjenci është themeluar në kundërshtim me marrëveshjen e Brukselit, që nënkuptonte se në të do të uleshin njerëz nga Beogradi, Prishtina dhe BE-ja. Ata tani po zbatojnë në mënyrë të njëanshme vendimet për dëbimin e serbëve dhe vendosjen e shqiptarëve, gjë që po bëhet së bashku me kryetarët e rrejshëm shqiptarë”, tha Petkoviq.

Ai shprehet se bëhet fjalë për më shumë se 100 familje, më saktë rreth 150 prej tyre.

“Prishtina nuk i zbaton vendimet e marra në favor të serbëve sepse edhe para agjencisë së UNMIK-ut ka më shumë se 29 mijë kërkesa për kthimin e pronave serbëve në jug të Ibrit. Nuk veprohet sipas atyre kërkesave, por u veprohet kërkesave të shqiptarëve”, tha ai.

Siç thotë ai, Beogradi ndjek një politikë paqeje dhe kërkon të ruajë popullin serb në Kosovë.

“Do të kërkojmë zgjidhje, do të insistojmë në dialog, do të insistojmë në formimin e BKS-së, por gjithçka që po ndodh duhet të ndalet”, tha drejtori i Zyrës së Qeverisë.

Sa i përket ekonomisë, siç thekson Petkoviq, Serbia do të bëjë gjithçka për të ndihmuar popullin e saj, por në aspektin e sigurisë, përgjegjësia është e KFOR-it dhe komunitetit ndërkombëtar që, siç thekson ai, të ndalojnë çmendurinë e Albin Kurtit.

I pyetur se ku është tani dialogu ndërmjet Beogradit dhe Prishtinës, Petkoviq thekson se Beogradi është gjithmonë i gatshëm për dialog dhe se Kurti është ai që nuk e dëshiron dhe që nuk dëshiron të formojë BKS.

“Kur të marrim ftesë nga Brukseli, jemi të gatshëm të përgjigjemi, e presim edhe Llajçakun në Beograd”, tha Petkoviq.