Petriç: Dialogu dështoi, BE-ja priti shumë që Prishtina të përmbushte obligimin e saj për formimin e BKS-së

Ish-i dërguari i Bashkimit Evropian për Kosovën, Volfgang Petriç, beson se ngjarjet e fundit në veri të Kosovës tregojnë se dialogu ka dështuar dhe se nevojitet një strategji e re.

Petriç ka thënë për Kosovo Online se është shumë i shqetësuar për situatën aktuale në veri të Kosovës.

"Duhet të merret parasysh nëse kjo është dëshmi se dialogu ka dështuar dhe se Brukseli duhet të zhvillojë një strategji të re që do të përfshijë kushtëzime dhe afate të qarta", shpjegoi ai.

Petriç ka theksuar se nëse nuk fillon shpejt procesi i formimit të Bashkësisë së Komunave Serbe, mund të thuhet se dialogu ka dështuar dhe se strategjia do të duhet të ndryshohet.

"Në dialog, të dyja palët duhet të përmbushin obligimet e tyre. Dhe dhjetë vjet dështimi për të përmbushur obligimin për formimin e BKS-së është shumë e gjatë", nënvizoi Petriç.

Petriç shtoi se ishte gabim që BE-ja priti shumë gjatë që Prishtina ta përmbushte atë kërkesë.

"Dhjetë vjet më parë u llogarit në vullnetin e mirë të pjesëmarrësve në dialog. Tani BE-ja duhet të pranojë se priti shumë gjatë për përmbushjen e obligimeve" është i bindur ai.

Petriç theksoi se nevojitet një strategji e re, fokusi i së cilës do të jetë zbatimi me afate të qarta, sepse kjo është ajo që aktualisht mungon në dialog.