Sejdarasi: Procesi i Berlinit tregoi vendosmërinë e BE për të mos hequr dorë nga Ballkani Perëndimor

Kryeredaktori i ekonomisë në ABC News nga Tirana, Bardhi Sejdarasi, vlerësoi për Kosovo online se samiti i Procesit të Berlinit tregoi vendosmërinë e BE-së për të mos hequr dorë nga Ballkani Perëndimor dhe se është e gatshme të fillojë zbatimin e Planit të Rritjes. Ai beson se vendimi i Prishtinës për bllokimin e mallrave serbe ka qenë i nxituar dhe për këtë ka pësuar presion të madh nga të gjitha anët.

“Takimi i Berlinit, me pjesëmarrjen e vendeve të Ballkanit Perëndimor, ishte vazhdimësi e projektit të nisur prej kohësh nga Komisioni Evropian, për të veçuar një fond prej gjashtë miliardë eurosh nga fondet e Bashkimit Evropian, i cili do të shërbente për të krijuar një treg të përbashkët rajonal”, thekson Sejdarasi.

Ai kujton se kjo ka qenë kërkesa e mëhershme e kryeministrit të Shqipërisë, Edi Rama.

“Ai kërkoi që pavarësisht nëse vendet e Ballkanit Perëndimor janë të gatshme për të qenë pjesë e BE-së, ato të ndihmohen dhe stimulohen për të zbatuar reformat e kërkuara nga Brukseli. Ajo që pritej ndodhi. Kontrata të rëndësishme u nënshkruan posaçërisht për ndarjen e një fondi granti prej dy miliardë euro dhe një fond tjetër prej katër miliardë eurosh, i cili do të jepet si kredi me kushte favorizuese. Shtetet kanë përfituar fonde në bazë të formulës së Komisionit Evropian”, shpjegon Sejdarasi.

Ai shton se shtatë për qind e gjithë fondit, që është kësti i parë, do të jepet menjëherë dhe se shpërndarja e fondit bëhet sipas sasisë së prodhimit të brendshëm bruto, dhe sipas numrit të popullsisë.

“Shqipëria ka marrë në total 922 milionë euro dhe 64 milionë jepen menjëherë si kësti i parë. Kështu është edhe për Kosovën, me një shifër pak më të ulët”, thotë Sejdarasi.

Ai thekson se vendet e Ballkanit Perëndimor do t'i përdorin këto para për të zbatuar reformat e kërkuara.

“Nëse këto reforma nuk zbatohen, Bashkimi Evropian do t'i marrë sërish këto fonde. Në total BE përdori rreth 30 milionë euro për rajonin tonë, ndërsa mbetën gjashtë miliardë. Në total, shuma që Brukseli përdor për projektet e veta është 1.7 trilion euro, ndërsa Ballkani Perëndimor merr vetëm 0.06 për qind të kësaj shume. Prandaj, është një fond modest, por gjithsesi ndihmon në realizimin e reformave”, thekson Sejdarasi.

Duke komentuar vendimin e fundit të Prishtinës për zhbllokimin e pjesshëm të importit të mallrave serbe, Sejdarasi thotë se ky ka qenë një vendim i ngutshëm i kryeministrit Albin Kurti që në fillim dhe se është ndryshuar nën presionin e Gjermanisë.

“Gjermania i vendosi qeverisë së Kosovës një kusht që nuk u shpall publikisht, por që lidhet me pjesëmarrjen e Prishtinës në marrëveshjen rajonale të tregtisë së lirë, CEFTA. Në këtë marrëveshje janë gjashtë vende, plus Moldavia. Presioni ndaj Kurtit ishte i madh dhe nga të gjitha anët, sepse ai krijoi pabarazi në marrëdhëniet tregtare në rajon. Kufizimi i transaksioneve kufitare sigurisht që krijon probleme, jo vetëm për qeveritë, por edhe për biznesin. Anulimi i kësaj mase nga Prishtina heq pengesën për hyrjen e mallrave serbe në Kosovë”, thotë Sejdarasi.

Në këtë mënyrë, thekson ai, tregtia në rajon do të jetë e lirë dhe qytetarët do të kenë mundësi të shkëmbejnë mallra dhe shërbime.

Në të njëjtën kohë, kjo do t'i hapë një rrugë të drejtpërdrejtë Kosovës që të bëhet anëtare e CEFTA-s në vend të përfaqësimit aktual nga UNMIK.

“Po ashtu, është lehtësuar edhe lëvizja e njerëzve për shkak se Kosova në mënyrë të njëanshme ka marrë vendim për heqjen e ndalimit të shtetasve të Bosnjës dhe Hercegovinës për të hyrë në vend me letërnjoftim, vendim ky që do të hyjë në fuqi më 1 janar të vitit të ardhshëm”, përfundon Sejdarasi.