Staroviq: Derisa BE-ja e shpërblen Prishtinën, Kurti do të inkurajohet të vazhdojë me lëvizjet e tij të njëanshme destabilizuese

Sekretari shtetëror në Ministrinë e Mbrojtjes së Serbisë, Nemanja Staroviq, thotë se kryeministri i Kosovës Albin Kurti ka shkarkuar Ekipin Menaxhues përgjegjës për formimin e Bashkësisë së Komunave Serbe, sipas marrëveshjeve të vitit 2013 dhe 2015.

Staroviq ka thënë në Twitter se zëdhënësi i BE-së Peter Stano ka thënë se një veprim i tillë “shkel letrën dhe frymën e marrëveshjes nga dialogu”.

“Por përderisa BE-ja vazhdon ta shpërblejë Prishtinën me liberalizimin e vizave dhe fillimin e procedurave për anëtarësim në Këshillin e Evropës, kjo do të jetë vetëm fjalë boshe dhe Kurti do të inkurajohet të vazhdojë me lëvizjet e tij të njëanshme destabilizuese”, thotë Staroviq.

Ministri i Vetëqeverisjes Lokale, Elbert Krasniqi dje ka njoftuar se ka shkarkuar Ekipin Menaxhues për hartimin e Statutit të Bashkësisë së Komunave Serbe.

“Pas prezantimit të djeshëm në Bruksel të Draft Statutit të Bashkësisë së Komunave me shumicë serbe, sipas kompetencave që i ka dhënë Ekipit Menaxhues me Marrëveshjen e Brukselit nga viti 2013 dhe 2015, ky ekip tani është pa status. Prandaj sot, më 3 maj, 2023, vendosa të shkarkoj anëtarët e këtij ekipi drejtues të përbërë nga Danijela Vujiçiq, Jellena Bolloviq, Igor Kallamar dhe Dejan Radojkoviq”, tha Krasniqi.