Staroviq e njohu ambasadoren e re të Gjermanisë me veprimet e Prishtinës kundër serbëve në Kosovë

Ministri i Integrimeve Evropiane i Serbisë, Nemanja Staroviq, u takua sot me ambasadoren e re të Gjermanisë në Beograd, Anke Holstein, të cilën e njohu me aktivitetet që Prishtina po ndërmerr kundër popullsisë serbe dhe popullsisë tjetër joshqiptare në Kosovë. Staroviq shprehu pritjen që Gjermania të vazhdojë të mbështesë afrimin e Serbisë drejt anëtarësimit në BE.

Siç thuhet në njoftimin e Ministrisë së Integrimeve Evropiane, Staroviq dhe Holstein biseduan për procesin e anëtarësimit të Serbisë në Bashkimin Evropian, zbatimin e reformave dhe mundësitë për avancimin e mëtejshëm të bashkëpunimit ndërmjet Serbisë dhe Gjermanisë në fushat me rëndësi për integrimet evropiane të vendit.

Ministri i uroi ambasadores mirëseardhje dhe mandat të suksesshëm në Serbi, duke vënë në dukje rëndësinë e dialogut të vazhdueshëm me Gjermaninë, si një nga shtetet më të rëndësishme anëtare të BE-së dhe një partner i rëndësishëm i Serbisë në procesin e anëtarësimit në Union.

Staroviq theksoi se Serbia është e përkushtuar ndaj një dialogu të hapur dhe përmbajtësor me Gjermaninë për reformat dhe procesin e anëtarësimit, me pritjen që ky shtet të vazhdojë të mbështesë rezultatet konkrete të reformave dhe afrimin e Serbisë drejt anëtarësimit në Bashkimin Evropian.

Ai i prezantoi bashkëbisedueses përparimin e Serbisë në përmbushjen e detyrimeve nga procesi i negociatave dhe nga Agjenda e Reformave, duke theksuar se Serbia është e përkushtuar ndaj përshpejtimit të procesit të reformave dhe përafrimit të mëtejshëm të legjislacionit vendas me acquis-në e Bashkimit Evropian.

Vëmendje e veçantë gjatë bisedës iu kushtua mundësive për mbështetjen e mëtejshme të Gjermanisë në procesin e modernizimit të Serbisë, veçanërisht përmes ndihmës profesionale dhe zhvillimore në fushat e sundimit të ligjit, mbrojtjes së mjedisit, zhvillimit të qëndrueshëm, si dhe ndihmës për forcimin e kapaciteteve institucionale të administratës publike serbe.

Staroviq e njohu në mënyrë të veçantë ambasadoren Holstein me „aktivitetet që institucionet e përkohshme të vetëqeverisjes në Kosovë e Metohi po ndërmarrin kundër popullsisë serbe dhe popullsisë tjetër joshqiptare“.