Tubim i madh mbështetës për të arrestuarit në Graçanicë: Populli serb do ta zgjedhë anën e duhur

Në sheshin para Stacionit Policor në Graçanicë, një numër i madh qytetarësh u mblodhën sot në një tubim mbështetës për serbët e arrestuar, drejtorë të institucioneve arsimore dhe shëndetësore.

Në protestë morën pjesë të punësuar nga spitalet, qendrat shëndetësore dhe shkollat, por edhe qytetarë, të cilët theksuan se në këtë mënyrë duan të tregojnë unitet.

“Kurrë nuk ka qenë më vështirë, por kurrë nuk ka qenë më bukur të jesh serb në Kosovë. Populli serb do ta zgjedhë anën e duhur”, tha Dushan Qirkoviq nga Dobrotini.

Millosh Rashiq nga Dobrotini theksoi se serbët janë të vendosur të mbeten, por se po përballen me presione të mëdha.

“Kam ardhur ta mbështes popullin tim serb, i cili prej shekujsh mundohet dhe lufton për të mbijetuar dhe për të qëndruar në këto troje. Po përballemi me presione të ndryshme dhe padrejtësi nga Albin Kurti dhe të tjerët. Ne jemi ata që jemi – këmbëngulës dhe duam të mbetemi e të mbijetojmë në vatrat tona, pavarësisht gjithçkaje që na kanë bërë dhe që po na bëjnë sot. Por kjo me të vërtetë e kalon çdo masë, që dikush të mos ketë ekzistencë dhe të drejtë për jetë. Ne serbët jemi popull qiellor, vërtet jemi, por që dikush të na terrorizojë dhe maltretojë kështu, të na arrestojë, të na fusë në burgjet e tyre dhe të na mohojë lirinë e fjalës dhe të drejtat”, tha Rashiq.

Lubisha Nedelkoviq i bëri thirrje Republikës së Serbisë që të ndalojë terrorin ndaj serbëve në Kosovë.

“Nuk shoh arsye pse sillen kaq arrogantë ndaj popullit tonë. Fakti që jemi mbledhur në këtë numër të madh është dëshmi se duam t’i mbështesim drejtorët tanë në arsim dhe shëndetësi, sepse konsiderojmë se jemi dëmtuar. I lutem Republikës së Serbisë të bëjë gjithçka që është në fuqinë e saj për ta ndalur këtë terror ndaj serbëve”, tha Nedelkoviq.

Në protestë morën pjesë edhe përfaqësues të vetëqeverisjeve lokale.

Më herët gjatë ditës, protesta u mbajtën edhe para shkollës “Vëllezërit Aksiq” në Lipjan dhe para Qendrës së Shëndetit në Graçanicë.

Ministri i Punëve të Brendshme të Kosovës, Xhelal Sveçla, deklaroi mbrëmë se në Graçanicë janë arrestuar shtatë persona të cilët, sipas tij, “me kërcënime, presion dhe shantazh kanë tentuar të ndikojnë në vullnetin e lirë të votuesve”.

Drejtori i Zyrës për Kosovë dhe Metohi, Petar Petkoviq, deklaroi se ndalimi i drejtorëve të institucioneve shëndetësore dhe arsimore të Republikës së Serbisë nga territori i Kosovës qendrore, me urdhër të Albin Kurtit, është përpjekje e Prishtinës për të ushtruar presion dhe frikësim të papranueshëm ndaj votuesve serbë në këto hapësira, në mënyrë që, siç tha ai, Kurti “ta shtyjë përpara të preferuarin e tij Nenad Rashiq në zgjedhjet e ardhshme”.

Arrestimin e dënoi Lista Serbe, ndërsa anëtari i Kryesisë së saj, Igor Simiq, theksoi se ky aksion ka për qëllim frikësimin e serbëve dhe se Rashiqi, duke i shënjestruar serbët dhe serbet e ndershme, “e ka mundësuar dhe futur policinë e Kurtit” në institucionet serbe të arsimit dhe shëndetësisë.