Xhihiq: Kosova ka humbur një vit dhe reputacion

Kosova, duke pasur parasysh se në Prishtinë ende nuk janë formuar institucionet, ka humbur një vit të tërë, gjë që ka pasur pasoja negative edhe për reputacionin e saj, ka vlerësuar politologu nga Instituti Austriak për Politikë Ndërkombëtare, Vedran Xhihiq.

“Nëse për një vit nuk kemi konsensus dhe kemi beteja politike, madje nga llogoret partiake, kjo do të thotë se shumë procese janë të bllokuara”, ka thënë Xhihiq për Kosovo online.

Ai theksoi se Kosovës, jo vetëm shumicës shqiptare, por edhe popullsisë pakicë, i nevojiten përparime në ekonomi, si dhe në fushën e arsimit dhe shëndetësisë.

“Ka shumë reforma që presin dhe shumë çështje të hapura. Kur i tërheqim vijat, ky është një vit i humbur”, nënvizoi Xhihiq.

Ai shtoi se jeta duhet të vazhdojë dhe se Kosova nuk ka qëndruar në vend, pasi qeveria në mandat teknik e Albin Kurtit, edhe pse pa mandat të plotë, ka tentuar të kryejë një pjesë të punës.

“Shtrohet pyetja se kur do të formohet qeveria e re dhe cilat do të jenë prioritetet e reja, përkatësisht nëse Kurti, përveç çështjeve të politikës së jashtme dhe përplasjeve me Serbinë, do t’u kthehet edhe çështjeve thelbësore si reformat dhe përparimi i shoqërisë kosovare. Këtë do ta shohim shumë shpejt”, është shprehur Xhihiq.

Përveç kohës, sipas tij, është humbur deri diku edhe imazhi i Kosovës si vend stabil, pikërisht për shkak të mungesës së një pushteti ekzekutiv me mandat të plotë.

“Disa procese që janë kyçe për Kosovën nuk kanë mundur të ecin përpara, siç është përparimi në rrugën evropiane, ku ekzistojnë vështirësi për shkak të vendeve mosnjohëse në BE, por mbi të gjitha për shkak të dialogut, sepse për një vit nuk ka pasur asnjë zhvillim”, shpjegoi Xhihiq.