Zyra për KdheM: Vrasja mizore e Dimitrije Popoviqit para 22 vitesh është një nga simbolet më të dhimbshme të vuajtjeve të serbëve

Zyra për Kosovë dhe Metohin kujtoi në një komunikatë se sot shënohen 22 vjet nga, siç thuhet, vrasja mizore e atëherë shtatëmbëdhjetëvjeçarit Dimitrije Popoviq nga Graçanica, vdekja e të cilit ka mbetur një nga simbolet më të dhimbshme të vuajtjeve të popullit serb në Kosovë në periudhën pas luftës.

“Dimitrije humbi jetën në mënyrë të pafajshme nga dora dhe si pasojë e urrejtjes monstruoze dhe irracionale të një shqiptari, fajtor vetëm sepse ishte serb nga Graçanica, një djalosh që nuk urrente askënd, por që vetë u bë shënjestër e atyre të cilëve intoleranca ua kishte errësuar mendjen”, thuhet në komunikatë.

Po ashtu theksohet se kujtimi për Dimitrijen nuk është vetëm kujtim i një jete të shuar para kohe, por edhe një paralajmërim për një periudhë kur shumë njerëz u bënë viktima të dhunës dhe intolerancës ndaj popullit serb.

“Rinia e tij, ëndrrat dhe e ardhmja e tij u ndërprenë nga një krim që la gjurmë të pashlyeshme te populli serb dhe në tërë Graçanicën. Në këtë ditë, me respekt të thellë, i bëjmë nderime Dimitrijes, duke ndarë dhimbjen dhe pikëllimin me familjen e tij, miqtë dhe të gjithë ata që ruajnë kujtimin për të, i cili nuk do të shuhet kurrë”, porosit Zyra.

Në komunikatë theksohet se, edhe pse format e presioneve sot janë të ndryshme, pozita e popullit serb në Kosovë vazhdon të karakterizohet nga sprova dhe vështirësi të shumta, ndërsa mohimi i të drejtave themelore të njeriut dhe përpjekjet për spastrimin etnik të popullit serb tregojnë se lufta për mbijetesë dhe për një jetë të sigurt ende vazhdon.

“Prandaj sot, më shumë se kurrë, kemi nevojë për unitet dhe bashkim, që të kalojmë të bashkuar përmes të gjitha sfidave, sepse këtë na e mëson edhe sakrifica e Dimitrijes. Pavarësisht gjithçkaje, serbët në Graçanicë mbeten të lidhur fort me familjet e tyre, rrënjët e tyre, shtëpitë dhe vendet e tyre të shenjta. Pikërisht kjo këmbëngulje dhe vendosmëria për të qëndruar dhe mbijetuar përbëjnë përgjigjen më të mirë ndaj politikës së urrejtjes me të cilën përballet populli ynë”, thuhet në komunikatë.

Shtohet se Zyra për Kosovë dhe Metohi do të vazhdojë të jetë mbështetje për popullin serb në Graçanicë dhe në mbarë Kosovën, duke ruajtur kujtimin për viktimat e pafajshme dhe duke kërkuar drejtësi për to, si dhe duke ofruar mbështetje për të gjithë ata që, pavarësisht sfidave të shumta, mbeten në trojet e tyre shekullore.