Zyra për KeM: U thyen dyert hyrëse të ambulancës serbe në fshatin Banjskë

Zyra për Kosov dhe Metohi njoftoi se persona të panjohur kanë thyer dyert hyrëse të ambulancës serbe në fshatin Banjskë, afër Vushtrrisë.

Siç theksohet, pamjen e xhamave të shpërndarë dhe dëmtimeve e ka gjetur punonjësi i ambulancës, i cili mëngjesin e sotëm kishte ardhur në punë.

“Kjo është ambulanca e vetme serbe në këtë enklavë serbe, e cila u shërben disa dhjetëra familjeve serbe, kryesisht të moshuarve, të cilëve ndihma mjekësore u nevojitet më së shumti. Banorët e fshatit janë të shqetësuar dhe të revoltuar nga ky veprim dhe pyesin nëse kjo është një porosi se ata janë të padëshiruar këtu”, thuhet në njoftim.

Shtohet se përfaqësuesit e Zyrës në terren kanë vizituar vendin e incidentit dhe se në afatin më të shkurtër do të sanohen dëmet dhe ambulanca do të rikthehet në funksion, në mënyrë që populli serb të mos vuajë pasojat e veprimeve të tilla.

“Ky rast është vazhdim i fushatës antiserbe të ekstremistëve shqiptarë të drejtuar kundër serbëve dhe institucioneve serbe në Kosovë dhe Metohi, gjë që tregon qartë shkallën e urrejtjes dhe intolerancës, me qëllim të qartë që t’u pamundësohet jeta dhe mbijetesa popullit serb në krahinën jugore. Jemi dëshmitarë se autoritetet në Prishtinë, me veprimet e tyre antiserbe dhe retorikën e urrejtjes, nxisin incidente të tilla dhe përhapin intolerancë etnike”, thuhet më tej.

“Prandaj është e domosdoshme të rritet niveli i sigurisë në mjediset serbe në Kosovë dhe Metohi, gjë që janë të obliguar ta sigurojnë përfaqësuesit e misioneve ndërkombëtare, si dhe që autorët e këtij akti të gjenden dhe të ndëshkohen sa më shpejt, në mënyrë që t’u vihet fundi këtyre dhe rasteve të ngjashme të dhunës”, përfundon Zyra për KeM.