Zyra për Kosovë dhe Metohi: Në Gorazhdec u shfaqën grafite të UÇK-së – qëllimi është të shqetësohen serbët dhe të largohen nga vatrat e tyre

Zyra për Kosovë dhe Metohi ka njoftuar se në Gorazhdec janë shfaqur sot në mëngjes grafite që madhërojnë UÇK-në, si pasojë e “politikës nxitëse dhe antiserbe të Prishtinës e udhëhequr nga Albin Kurti”, duke theksuar se Policia e Kosovës, siç duket, nuk ka vullnet as vendosmëri për t’i ndriçuar këto incidente.

“Në Gorazhdec janë shfaqur sot në mëngjes grafite fyese dhe provokuese që lavdërojnë organizatën terroriste UÇK, çka ka shqetësuar banorët e këtij enklave serbe në Metohi, veçanërisht duke pasur parasysh që shumë bashkëkombës tanë nga ky rajon janë vrarë pikërisht nga krimet e anëtarëve të kësaj organizate”, thuhet në deklaratë.

Shtohet se ky nuk është incident i izoluar, pasi ditëve të fundit në disa vende të tjera, veçanërisht në hyrje të fshatit, janë shfaqur grafite me përmbajtje të njëjtë.

Edhe pse këto incidente janë raportuar tek Policia e Kosovës, sipas fjalëve të banorëve të Gorazhdecit, ndaj tyre nuk është treguar kujdesi i duhur.

“Është e dukshme se provokimet në këtë fshat serb janë bërë më të shpeshta që nga heqja e flamurit serb nga kompleksi memorial për viktimat në fillim të janarit të këtij viti, por në ditët e fundit ato janë bërë më të shpeshta, dhe asnjë nga incidentet nuk ka marrë një epilog, as autorët nuk janë kapur dhe sanksionuar në mënyrë adekuate. Është veçanërisht treguese që e ashtuquajtura Policia e Kosovës në Gorazhdevc ka instaluar kamera, por me sa duket nuk ka vullnet apo vendosmëri për të hedhur dritë mbi këto incidente”, thonë nga zyra për KeM.

Ata deklarojnë se është vërtetuar vazhdimisht se sulmet ndaj serbëve dhe provokimet ndaj të cilave është i ekspozuar populli serb janë rezultat i "politikës nxitëse dhe antiserbe të Prishtines të udhëhequr nga Albin Kurti".

“Dhe qëllimi i incidenteve të tilla është t’i shqetësojë serbët dhe t’i detyrojë ata të largohen nga shtëpitë e tyre. Kjo është arsyeja pse serbët që jetojnë në enklava, si kategoria më e ndjeshme e popullsisë, janë veçanërisht nën sulm, por ata janë të vendosur të qëndrojnë dhe të mbijetojnë pavarësisht të gjitha sfidave dhe provokimeve”, thuhet në deklaratë.