Beqkoviq: Drama e Kosovës po shpaloset para syve të gjithë botës, nuk bëhet fjalë për 15 për qind të territorit, por për 100 për qind të dinjitetit serb

Akademiku dhe poeti Matija Beqkoviq, në Akademinë e Shën Savës në Berane, theksoi se drama e Kosovës po shpaloset para syve të gjithë botës, duke shtuar se nuk bëhet fjalë për 15 për qind të territorit të shtetit serb, por për 100 për qind e fytyrës, nderit dhe dinjitetit serb, transmeton “Dan” të Podgoricës.

“Në pyetjen se çfarë duhet bërë, përgjigja është dhënë njëherë e përgjithmonë, në Vidovdani të vitit 1389”, tha Beqkoviq.

Siç theksoi ai, Kisha Serbe e Shën Savës është kështjellë e së vërtetës, roje e kujtesës dhe e identitetit.

“Është e vetmja çati që ka populli serb dhe i vetmi institucion ku ka qenë i lirë dhe i bashkuar me shekuj. Prandaj nuk duhet të çuditemi që edhe sot është kryqëzuar, dhe në shekullin e 21 ortodoksia u shpall armiku më i madh”, tha Beqkoviq.

Duke folur për Shën Savën, Beqkoviq theksoi se kryepeshkopi i parë serb la trashëgim tokën serbe ku la gjurmët e tij kudo.

“Aty ku dheu është më i fortë dhe i gurtë, ai ka gërmuar më thellë. Populli serb është vepra më e rëndësishme e Shën Savës, e Shën Sava është vepra më e rëndësishme e popullit serb”, tha poeti.

Beqkoviq shtoi se ajo që është Manastiri i Cetinjes për Malin e Zi të Katunit, Gjurgjevi Stupovi është për Serbinë në Vasojeviqi.

"Gjurgjevi Stupovi janë një strumbullar i pathyeshëm me të cilin është lidhur anija e Serbisë dhe Malit të Zi", tha ai.

Beqkoviq vizitoi dje manastirin e Gjurgjevi Stupovi. Në Akademinë e Shën Savës morën pjesë një numër i madh qytetarësh, personalitete të kishës, funksionarë partiakë dhe zyrtarë.