Shoferët e kamionëve bllokuan Merdarin: Sistemi EES dëmton të gjithë, pasojat do të ndihen edhe jashtë vendit

Shoferët e kamionëve që sot bllokuan vendkalimin Merdar për shkak të zbatimit të sistemit evropian të regjistrimit të hyrje-daljeve (EES) thanë për Kosovo online se masat nga Brukseli ndikojnë negativisht tek të gjithë dhe se pasojat e bllokadave do të ndihen edhe jashtë vendit. Sipas tyre, shoferët duhet të përjashtohen nga masat e reja derisa të gjendet një zgjidhje e përhershme, ndaj kërkojnë takim me përfaqësuesit e Këshillit Evropian dhe paralajmërojnë masa më radikale nëse kërkesat e tyre nuk përmbushen.

Punëdhënësi Lubisha Nejdanoviq tha se masat nga Brukseli ndikojnë si te shoferët ashtu edhe te punëdhënësit.

“Jemi mbledhur sot këtu për shkak të problemeve që ka transporti ynë ndërkombëtar. Si ne si punëdhënës, ashtu edhe shoferët tanë. Bëhet fjalë për zonën Shengen, rregullin 90 ditë në 180, që nuk na mbulon dhe sjell probleme të ndryshme, në kuptimin që shoferët që i kalojnë 90 ditë në Shengen trajtohen si kriminelë, deportohen, u vendosen ndalesa hyrjeje nga gjashtë muaj deri në dy vjet, ndërsa këta janë kryesisht njerëz që punojnë dhe jetojnë nga ky profesion”, tha Nejdanoviq për Kosovo online.

Ai theksoi se punëdhënësit rrezikojnë të humbasin shoferët, prandaj, siç tha, është i nevojshëm një takim me përfaqësuesit e Këshillit Evropian.

“Qëllimi është të fillojë shqyrtimi (i rregullores së Këshillit Evropian) dhe që kjo rregullore e padrejtë të pezullohet derisa të arrihet një zgjidhje përfundimtare. Ne jemi këmbëngulës, gjithçka është e bllokuar. Nuk është tekë e jona, thjesht jemi të detyruar”, tha ai.

Nejdanoviq theksoi se bllokadat do të zgjasin derisa të përmbushen kërkesat e transportuesve.

“Nuk do të ndërpriten lehtë, derisa të marrim garanci të forta se çështja do të merret në shqyrtim dhe se do të na ftojnë në takim, përkatësisht ministrinë tonë. Këtë e vuajnë të gjithë, jo vetëm ekonomia serbe, por edhe jashtë vendit – Franca, Gjermania dhe industria e lidhur automobilistike”, shtoi punëdhënësi.

Ai vuri në dukje se efektet jashtë vendit do të ndihen brenda dy deri në tre ditë, duke shtuar se pret një zgjidhje pozitive të situatës.

Zoran Nikoliq, pronar i kompanisë “Nikolić Transport” nga Kurshumlia, tha se rrugët janë bllokuar sepse institucionet kompetente për muaj të tërë nuk kanë reaguar ndaj paralajmërimeve të transportuesve.

“Kjo është një masë radikale që u detyruam ta ndërmarrim për të mbrojtur punën tonë. Masat represive të BE-së tashmë kanë hyrë në fuqi dhe shoferët që i tejkalojnë 10 ditë në gjashtë muaj tashmë bllokohen jashtë vendit, trajtohen si emigrantë, kamionët bllokohen, u vendosen gjoba dhe deportohen”, tha Nikoliq.

Ai vlerësoi se pasojat e këtyre masave do të ndihen brenda një deri në dy muaj, gjë që do të çojë në ndalimin e plotë të transportit ndërkombëtar.

“Presim që, në kënaqësinë e tyre dhe tonën, të gjendet ndonjë zgjidhje. Kërkesa jonë tani është që të ndalet represioni ndaj shoferëve derisa të gjendet një zgjidhje. Nëse kjo ndodh sot, nesër apo pasnesër…, ne menjëherë do ta ndërpresim këtë bllokadë”, tha ai.

Ai shtoi se trafiku është bllokuar në të gjitha pikat kufitare dhe administrative në Serbi, si dhe në Bosnje e Hercegovinë, Mal të Zi dhe Shqipëri, duke theksuar se të gjithë shoferët kanë të njëjtin problem.

Nëse nuk arrihet marrëveshje, Nikoliq tha se një numër i madh shoferësh po marrin pjesë në bllokada dhe se vetëm Brukseli mund ta zgjidhë situatën.

“Në Serbi ka rreth 170.000 ose 180.000 shoferë. Askush nuk e mori këtë seriozisht, por kjo nuk është diçka që mund ta zgjidhë Serbia. Është Brukseli ai që duhet të na mundësojë që shoferët të përjashtohen nga statusi i turistëve, sepse këta janë njerëz që kryejnë punën e tyre, pra bëhet fjalë për viza pune”, shtoi Nikoliq.

Ai theksoi se nuk e di se si do ta zgjidhë Brukseli problemin, por tha se shoferët janë të gatshëm t’i ndërpresin bllokadat në momentin kur të arrihet një marrëveshje.

“Sa i përket këmbënguljes, ne kemi siguri për shtatë ditë. Pas kësaj, unë nuk jam ai që vendos se çfarë do të ndodhë, por me siguri do të ketë masa më radikale dhe mund të ndodhë që transporti të bllokohet plotësisht”, paralajmëroi ai.