Burjani: Lista e votuesve ndryshon në varësi të faktorëve demografikë

Analisti politik Blerim Burjani tha për Kosovo online se lista e votuesve në Kosovë ndryshon çdo vit zgjedhor dhe se Komisioni Qendror i Zgjedhjeve miraton vendimin për listën e re, e cila sipas ligjit duhet të jetë e përditësuar dhe e besueshme.

Ai shtoi se lista ndryshon në varësi të faktorëve demografikë.

„Çdo komunë ka faktorët e vet demografikë dhe nuk ka standarde të tjera që ndikojnë në listë. Nëse ndodh diçka jashtë kësaj, kjo do të thotë se është kundër ligjit. Edhe adresat ndikojnë në listën zgjedhore, nëse qytetarët i ndryshojnë ato“, tha Burjani.

Nëse kanë informacione për standarde të dyfishta, siç theksoi ai, partitë mund të paraqesin ankesë në Panelin Zgjedhor për Ankesa dhe Parashtresa.

Komisioni Qendror i Zgjedhjeve i Kosovës të shtunën ka certifikuar listën e votuesve për zgjedhjet lokale për kryetarë dhe këshilltarë të kuvendeve komunale, të cilat do të mbahen më 12 tetor. Numri i përgjithshëm i qytetarëve me të drejtë vote në këto zgjedhje është 2.069.098.

Lista Serbe njoftoi dje se, për shkak të shkeljes së ligjit dhe rregullave të KQZ-së, ka paraqitur ankesë në Panelin Zgjedhor për Ankesa dhe Parashtresa lidhur me shpërndarjen e vendeve në këshillat e votimit dhe numrin e votuesve në komunat me shumicë serbe.

Nënkryetari i Listës Serbe, Igor Simiq, tha se në komunën e Leposaviqit numri i votuesve është ulur për 1.508, ndërsa në Mitrovicën e Veriut për 1.264, ndërkohë që në Graçanicë numri i votuesve është rritur për 10 për qind, respektivisht për 2.444 votues.