Cili është fati i pesë “jo” evropiane për Prishtinën?

Pesë vende të Bashkimit Evropian po i rezistojnë presionit nga Brukseli dhe Uashingtoni për të njohur Kosovën, siç dëshmohet nga deklaratat e zyrtarëve të lartë të tyre, po aq këmbëngulëse janë edhe pritjet e Prishtinës që të paktën njëri prej tyre të nënshtrohet. Këtë e dëshmon edhe deklarata e ministres së Jashtme të Kosovës, Donika Gervalla, se pret që Greqia “së shpejti të shkojë drejt njohjes” së pavarësisë së Kosovës, raporton Blic.

Spanja, Qiproja, Sllovakia, Rumania dhe Greqia janë pesë nga 27 vendet e BE-së që nuk e njohin pavarësinë që Kosova shpalli në vitin 2008. Ai vendim ndikohet nga marrëdhëniet e mira me Beogradin, por edhe nga fakti se pavarësia e Kosovës është thembra e "akilit" e secilit prej tyre, për shkak të problemeve të tyre të brendshme.

Drejtori i Qendrës për Rajonalizëm, Aleksandar Popov, thotë për Blic se nëse do të ketë njohje të reja të pavarësisë së Kosovës, ato nuk do të pasojnë individualisht, por të pesë vendet do ta njohin së bashku.

“Më duket se do të jetë një lloj pakete. Dhe kjo do të pasonte si marrëveshje brenda BE-së dhe pasoja do të ishte që ato vende të mos e pengojnë hyrjen e Kosovës në organizatat ndërkombëtare, me përjashtim të Kombeve të Bashkuara. Momenti kyç do të jetë formimi i BKS-së, por edhe të ecim përpara me zbatimin e marrëveshjes në Ohër”, vlerëson Popov.

Koordinatori i Konventës Kombëtare të BE-së për kapitullin 35, Dragisha Mijaçiq, konsideron se marrëveshja në Ohër ka një rol të rëndësishëm.

Mijaçiq vlerësoi se marrëveshja u solli shumë shpresa dhe pritshmëri përfaqësuesve të BE-së dhe atyre vendeve të bashkësisë ndërkombëtare që u përfshinë aktivisht në negociata, mes tyre edhe SHBA, por edhe se është ende herët për të parashikuar efektet e saj.

“Është ende herët për të parashikuar, duke përfshirë edhe pritjet se zbatimi i saj do të çojë në njohjen e pesë vendeve të BE-së që ende nuk e kanë bërë këtë. Bazuar në gjithçka që kemi parë në ditët e para pas arritjes së marrëveshjes, njohjet e reja të pavarësisë së Kosovës do të ishin befasi. Megjithatë, marrëveshja sigurisht që do të kontribuojë në afirmimin ndërkombëtar të Kosovës, në atë mënyrë që do të gjenden zgjidhje kreative për anëtarësimin e saj në shumë organizata botërore, evropiane dhe rajonale”, ka thënë Mijaçiq për Juronjuz Serbia.

Greqia ka një qëndrim specifik, thekson Mijaçiq.

“Për sa i përket vetë Greqisë, në ato qarqe diplomatike prej disa kohësh ekziston një mendim që Greqia duhet të rregullojë marrëdhëniet me shqiptarët, pra se interesi kombëtar i Greqisë është që të rregullohen marrëdhëniet me Shqipërinë dhe me shqiptarët në përgjithësi. Nga ana tjetër, nuk duhet të harrojmë se qeveria aktuale në Greqi është nën ndikimin e fortë të Uashingtonit, kështu nëse Uashingtoni kërkon diçka në këtë drejtim, mendoj se Greqia do të ndryshojë qëndrimin e saj”, tha Mijaçiq.