Fjalët përfundimtare në rastin e Gavrillo Millosavleviqit, mbrojtja pret aktgjykim lirues

Para Departamentit Special të Gjykatës Themelore në Prishtinë, sot u mbajtën fjalët përfundimtare në rastin që po zhvillohet ndaj Gavrillo Millosavleviqit. Pas paraqitjes së fjalëve përfundimtare, mbrojtja theksoi se, duke analizuar provat, e vetmja aktgjykim i drejtë do të ishte lirimi i tij.

Avokati Dejan Vasiq theksoi se, duke analizuar provat, nuk mund të nxjerrë ndonjë përfundim tjetër përveç se Millosavleviq duhet të lirohet.

“Në pjesën hyrëse të fjalës sime përfundimtare, duke vërejtur që në sallën e gjyqit kishte shumë kamera, e shfrytëzova rastin t’i drejtohem edhe popullit, për të cilin prokurori konsideron se po i sjell drejtësi dhe në emër të të cilit do të jepet aktgjykimi, për të treguar se në çfarë mënyre po zbatohet drejtësia ndaj një serbi që vetëm ka dashur të gjejë mbetjet mortore të nënës së tij e cila është zhdukur pas luftës, dhe çfarë i vihet në barrë vetëm mbi deklaratën e një dëshmitari – plotësisht të rreme. Mbrojtja ime sot ishte e përqendruar vetëm në demaskimin e gënjeshtrës së atij dëshmitari të vetëm, i cili kinse e kishte parë duke qëlluar mbi të burgosur shqiptarë në fushën sportive të burgut të Dubravës. Mendoj se e kemi demaskuar plotësisht atë ‘kampion’ të dëshmisë së rreme para gjykatës,” deklaroi Vasiq.

Avokati Nebojsha Vllajiq thekson se janë përqendruar në deklaratat e dëshmitarëve, sepse, siç thotë ai, kjo është e vetmja gjë që prokurori përpiqet të vërtetojë – të fajësojë të pandehurin.

“Megjithatë, situata nuk është e tillë. Kur e dëgjoni fjalën përfundimtare të tij, është një interpretim shumë selektiv i deklaratave të dëshmitarëve – ai i merr dhe përdor vetëm ato pjesë që i shkojnë për shtat. Unë besoj se gjykata do të duhet t’i interpretojë ato deklarata në tërësinë e tyre, dhe veçanërisht në lidhje me deklaratat e tjera. Për çfarë bëhet fjalë? Në atë vend, kinse kanë qenë të pranishëm disa qindra njerëz, e ne kemi marrë në pyetje shtatë dëshmitarë okularë. Asnjëri prej tyre nuk ka parë apo dëgjuar atë që ai një dëshmitar ka thënë se ka parë dhe dëgjuar. Pra, nëse kemi një deklaratë të vetme pa mbështetje, dhe në këtë rast kemi pikërisht të tillë, gjykatësi duhet ta hedhë poshtë, sepse ai dëshmitar, njëri nga të shtatë, nuk mund të ketë aftësi mbinatyrore që të shohë dhe dëgjojë atë që askush tjetër nuk ka mundur,” theksoi Vllajiq.

Aktgjykimi për Gavrillo Millosavleviqin do të shpallet më 16 qershor.