Brnabiq dhe Svollvell diskutuan bashkëpunimin ndërmjet Serbisë dhe SHBA-së dhe stabilitetin në rajon

Kryeministrja e Republikës së Serbisë, Ana Brnabiq, ka biseduar sot me kongresmenin amerikan Erik Svollvell për marrëdhëniet dypalëshe, bashkëpunimin ekonomik dhe forcimin e përpjekjeve për arritjen e paqes dhe stabilitetit në rajon, njoftoi Qeveria e Serbisë.

Kryeministrja Brnabiq tha se SHBA-të janë një nga partnerët më të rëndësishëm ekonomike të Republikës së Serbisë dhe se bashkëpunimi ekonomik po zhvillohet intensivisht në fusha të ndryshme.

Sipas saj, SHBA-ja është aktualisht partneri më i madh i Serbisë në eksportin e shërbimeve, ka një fluks në rritje të investimeve nga kompanitë amerikane, ka mbështetje të konsiderueshme financiare përmes programeve të ndryshme të ndihmës zhvillimore, ndërsa kompanitë amerikane janë të përfshira edhe në realizimin e projekteve kapitale të infrastrukturës.

Kongresmeni Svollvell falënderoi kryeministren e Serbisë për bisedën konstruktive, aktivitetet e Serbisë në zhvillimin e bashkëpunimit rajonal, si dhe mënyrën se si Beogradi e udhëheq procesin e normalizimit të marrëdhënieve me Prishtinën.

Në përfundim, Svollvell tha se pas kësaj vizite po kthehet në Kongres me mesazhin se Serbia është një vend ekonomikisht i fortë dhe stabil, me potencial ekonomik në rritje dhe klimë të mirë investuese.

Në bisedë mori pjesë edhe ambasadori serb në Uashington, Marko Gjuriq.