Daçiq në festimin e jubileut të pavarësisë së Angolës: Serbia dhe Angola ruajnë miqësinë tradicionale

Zëvendëskryeministri dhe ministri i Punëve të Brendshme të Serbisë, Ivica Daçiç, i cili në emër të presidentit Aleksandar Vuçiq mori pjesë në ceremoninë qendrore të shënimit të 50-vjetorit të pavarësisë së Republikës së Angolës në Luandë, theksoi se ndërmjet Serbisë dhe Angolës ekziston respekt i madh reciprok dhe miqësi shumëvjeçare, duke nënvizuar se Angola respekton integritetin territorial të Serbisë.

Pas paradës së mbajtur në kompleksin memorial “dr Antonio Agostinho Neto”, Daçiq deklaroi se Serbia, përkatësisht ish-Jugosllavia, dhe Angola kanë qenë miq të mëdhenj, dhe se bashkëpunimi mes dy vendeve është ndërtuar mbi lidhjet historike që datojnë nga koha e luftës së Angolës për çlirimin nga kolonializmi.
“Ajo që është me rëndësi të thuhet është se Serbia, përkatësisht Jugosllavia, dhe Angola kanë qenë miq të mëdhenj. Për ne është një nder i madh që udhëheqësit e Angolës, pas 50 vitesh nga shpallja e pavarësisë, vendosën t’i japin një dekoratë Josip Broz Titit për kontributin e tij dhe të Jugosllavisë në atë kohë në luftën për çlirimin e Angolës. Kjo dëshmon se sa të forta janë marrëdhëniet tona dhe sa shumë ka ndihmuar Jugosllavia në arritjen e pavarësisë – nga trajnimi, bursat, shkollimi i njerëzve dhe kuadrove, përfshirë edhe ushtrinë, deri te ndihma me armë, siç thonë ata, në mënyrë që kjo luftë të mund të përfundojë me sukses,” tha Daçiq.

Ai theksoi se Angola respekton integritetin territorial të Serbisë dhe ka votuar kundër anëtarësimit të Kosovës në UNESCO dhe INTERPOL.
“E gjithë kjo tregon se Angola ka një qëndrim me të vërtetë të rëndësishëm dhe prioritar ndaj Serbisë, si trashëgimtare e Jugosllavisë. Na dorëzuan edhe këtë dekoratë për Titon. Nga ana tjetër, Angola qëndron fort në pozicionet e respektimit të integritetit territorial të Serbisë. Ajo ka votuar kundër pranimit të Kosovës në Unesco dhe Interpol, dhe gjithmonë ka qenë në anën tonë. Prandaj mendoj se është shumë me rëndësi që, përveç Portugalisë, ne ishim të pranishëm këtu në nivelin më të lartë nga vendet evropiane në shënimin e këtij përvjetori të madh,” tha zëvendëskryeministri serb.
Daçiq theksoi gjithashtu se Republika e Angolës, me rreth 36 milionë banorë, ka potencial të madh për zhvillimin e bashkëpunimit ekonomik me Serbinë, dhe se synimi është forcimi i mëtejshëm i lidhjeve politike dhe ekonomike.
Republika e Serbisë dhe Republika e Angolës kanë marrëdhënie tradicionale miqësore diplomatike që nga viti 1975, kur ish-RSF e Jugosllavisë ishte ndër shtetet e para që njohën pavarësinë e Angolës dhe vendosën marrëdhënie diplomatike.