Hamza: Projektligji e kufizon Gjykatën Speciale vetëm në raportin e Dick Marty dhe transferon raste të tjera në Kosovë

Kryetari i DPK-së, Bedri Hamza, theksoi se Projektligji për Ndryshimet në Ligjin për Dhomat e Specializuara dhe Zyrën e Prokurorit të Specializuar i kufizon kompetencat e Dhomave të Specializuara vetëm në akuza specifike nga raporti i Dick Marty, ndërsa rastet që nuk bien nën juridiksionin e tij do të transferohen në Kosovë.

Hamza tha se Kuvendi duhet të marrë përsipër përgjegjësinë e tij kushtetuese dhe legjislative duke shqyrtuar seriozisht dispozitat ligjore që rregullojnë punën e Dhomave të të Specializuara. 

"Kuvendi ka përgjegjësinë të shqyrtojë ligjin kur konsideron se ai nuk pasqyron qëllimin për të cilin është miratuar. Projektligji e bën këtë, sepse kërkon që akuzat të kenë një lidhje specifike me akuzat për të cilat është krijuar kjo gjykatë. Jo një lidhje e përgjithshme dhe jo interpretime të pafundme. Jo një zgjatje të mandatit vetëm sepse ka ndodhur ndonjë ngjarje gjatë luftës. Duhet të ketë një lidhje të qartë me misionin për të cilin është krijuar ky mekanizëm. Projektligji parashikon që, kur një çështje nuk bie nën këtë juridiksion, ajo do të transferohet në Kosovë, së bashku me dosjet, provat dhe materialet. Drejtësia vazhdon, por vazhdon aty ku ligji thotë se duhet të vazhdojë", tha Hamza.

Ai shtoi se ky projektligj trajton edhe çështjen e përgjegjësisë.

"Gjatë viteve, Dhomat e Specializuara kanë punuar jashtë Kosovës dhe, për shkak të modelit të tyre institucional, me një shkallë të caktuar pavarësie nga institucionet e Kosovës. Vetë Dhomat e Specializuara e përshkruajnë veten si institucione të pavarura nga institucionet e Kosovës. Projektligji propozon që organizatat ndërkombëtare profesionale mund të autorizohen të mbikëqyrin punën e tyre. Jo për të ndërhyrë në vendime, por për të kontrolluar nëse respektohen të drejtat e njeriut, standardet e gjykimit të drejtë, kushtet e paraburgimit, mbrojtja e dëshmitarëve dhe kohëzgjatja e procedurave. Pas kësaj, këto organizata do t'i raportojnë Kuvendit dhe publikut", tha ai. Hamza.

Sipas tij, këto ndryshime nuk e shfuqizojnë Gjykatën Speciale, por e rikthejnë mandatin për të cilin është themeluar.

"Ajo përcakton se merret me akuzat specifike për të cilat është themeluar dhe se është e lidhur me raportin e Dick Marty. Për krime të tjera lufte dhe akte që nuk lidhen drejtpërdrejt me ato akuza, institucionet gjyqësore të Kosovës marrin përgjegjësi. Asnjë rast nuk mbyllet vetëm sepse bie jashtë juridiksionit të Gjykatës Speciale. Nëse një rast nuk bie nën juridiksionin e saj, ai transferohet në Kosovë. Projektligji nuk krijon një vakum ligjor", theksoi Hamza. 

Ai kërkoi mbështetjen e grupeve të tjera parlamentare në Kuvend për të ndryshuar Ligjin për Dhomat e Specializuara.