Koshta: E ardhmja e qytetarëve të Kosovës është në Bashkimin Evropian

Presidenti i Këshillit Evropian, Antonio Koshta, i uroi qytetarët e Kosovës për Ditën e Evropës dhe tha se e ardhmja e tyre është në Bashkimin Evropian.

Koshta iu drejtua qytetarëve të Kosovës si anëtarë të ardhshëm të Bashkimit Evropian.

"Të dashur qytetarë të Kosovës, sot ju drejtohem juve si anëtarë të ardhshëm të Bashkimit Evropian. Në Ditën e Evropës, ne festojmë projektin tonë të përbashkët evropian, kur themeluesit tanë zgjodhën unitetin mbi ndarjen dhe bashkëpunimin mbi konfliktin", tha Koshta.

Ai theksoi se e ardhmja e qytetarëve të Kosovës është në BE, duke deklaruar se po bëhet shumë punë në atë drejtim.

"Ata vendosën të ndërtojnë një të ardhme paqeje, lirie dhe prosperiteti mbi hirin e Luftës së Dytë Botërore. Ne besojmë se e ardhmja juaj është në Bashkimin Evropian. Po bëhet shumë punë për ta bërë atë realitet. Ju keni të njëjtin qëllim si pjesa tjetër e rajonit - Bashkimin Evropian. Vazhdoni të punoni për ta bërë atë realitet. Së bashku do të ndërtojmë një të ardhme të përbashkët evropiane. Rroftë Evropa", tha Koshta.